_Coment la cité d'Acre fu prise. Et coment le roy Phelippe retourna en
France pour sa maladie et pour la doubte de la traïson le roy Richart._
Tandis comme ces choses avinrent en France, le bon roy Phelippe qui tenoit
le siège devant Acre, assembla toute sa gent à tout quanqu'il avoit
d'effort; la cité prist à assaillir moult aigrement; des murs abati moult
grant plenté à ses pierres et à ses mangonniaux et la mist en tel point
qu'elle estoit ainsi comme au prendre. Quant les satrapes Limatouse et
Caracouse qui dedens estoient, qui la cité gardoient de par le soudan
Salhadin et estoient chevetainnes de tous les autres Sarrasins qui léans
estoient en garnison, virent qu'il ne povoient plus deffendre la cité
qu'elle ne fust prise, il se rendirent par telle condition qu'il
eschaperoient, sauf leur corps et leur vies tant seulement, et rendroient à
nos crestiens la saincte croix que Salhadin avoit, et tous les crestiens
qui estoient en chetivoison parmi toute la terre du soudan.
Tout ce orent en convenant à faire au roy de France et au roy d'Angleterre
avant qu'il fussent délivrés. En cel assaut fu tué Aubery le mareschal au
roy de France, chevalier hardi, preux, noble et courageux aux armes; car il
se mist si avant qu'il fu entrepris entre deux portes et occis. La Tour
maudite qui moult longuement et moult griefment avoit nos crestiens grevés
fu minée des mineurs le roy Phelippe; hordée et apuiée par dessous de
busches et de fusts, si qu'il ne failloit fors bouter le feu qu'elle ne
tresbuchast à terre. Pour ce, se rendirent les Sarrasins ainsi comme nous
avons devant conté, quant il virent qu'il ne pourroient constrester aux
roys et aux princes crestiens. Armes, chevaux et viandes rendirent et
toutes leurs garnisons de la cité. Les portes ouvrirent à nos crestiens qui
plouroient pour la grant joie qu'il avoient, et levoient leur mains au ciel
en criant à haute voix: «Benoit soit le nom de Nostre-Seigneur qui a
regardé nos travaux et nos sueurs; et qui a mis à humilité soubs nos piés
les ennemis de la croix qui avoient fiance et présumpcion en leur vertu.»
Les viandes qui léans furent trouvées furent également parties selon ce
qu'il estoient et qu'il avoient de gens. Les deux roys partirent les
prisonniers, si en eut autant les uns comme les autres. Le roy Phelippe
livra sa partie au duc de Bourgoingne, grant somme d'or et d'argent et
grant infinité de viandes, et le fist garde et chevetaine de tout son ost,
car il estoit malade de moult griève enfermeté. Et d'autre part il avoit le
roy d'Angleterre souspeçonneux de traïson, pour ce qu'il envoioit moult
souvent messages au soudan Salhadin sans son sceu, et recevoit de luy
divers dons et divers présens. Pour ce manda le roy ses barons privéement
et leur fist un sermon moult secret et moult familier. Et moult les
amonesta et pria de bien faire, si prist atant congié d'eux en pleurs et en
souspirs; en mer se mist à trois galies tant seulement qu'un Genevois luy
ot appareilliées qui estoit nommé Rufin de la Voute. Tant erra par mer
qu'il arriva en Puille. Là demeura un pou de temps jusques à tant qu'il ot
santé recouvrée; et quant il fu oncques resposé des travaux qu'il avoit eus
et receus en mer, puis se mist au chemin assez foible, comme cil qui
n'estoit encore mie plainement renforcié.
Droit parmi la cité de Rome s'en alla pour visiter les apostres et
l'apostole Célestin; puis se mist en chemin et arriva en France droit à la
nativité Nostre-Seigneur.
Le roy Richart qui de là fu demouré fist venir devant luy tous les
Sarrasins prisonniers et tous les autres aussi que les autres princes
tendent: Limatouse et Caracouse qui d'eux estoient chevetaines semont et
ammonesta qu'il rendissent à la crestienté la saincte croix que Salhadin
tenoit sans demeure, et tous les crestiens esclaves qu'il tenoient en leur
terre, si comme il avoient juré par le serment de leur loy. Et pour ce
qu'il ne porent tenir les convenances qu'il avoient faictes et jurées, pour
ce que Salhadin ne s'i vouloit accorder, le roy Richart qui moult en fu
courroucié en fist mener cinq mille et plus dehors la cité et leur fist les
chiefs couper. Mais toutesvoies retint-il aucuns des plus grans et des plus
riches et les mist à raençon, desquels il ot avoir sans nombre.
Aux Templiers vendi l'isle de Chipre qu'il ot prise en son venir, quant il
trespassoit par mer: le prix en fu vingt et cinq mille mars d'argent; et
puis la leur tolli et la vendi de rechief et quita oultréement à Guy qui ot
esté devant roy de Jhérusalem. La cité d'Escalonne abati et destruist à la
requeste des Sarrasins, pour le grant avoir qu'il en donnèrent.
A un prince tolli la bannière le duc d'Osteriche, assez près d'Acre;
toute la desrompi et despeça, puis la fist jetter en une chambre
courtoise[110], en vilté et en despit du duc. Mais pour ce que n'avons
pas en volenté, n'en propos de descrire les fais aux roys d'Angleterre,
drois est que nous retournons à descrire les histoires du bon roy
Phelippe de France.