Quant le duc vit qu'il ne pourrait au roy contrester n'endurer longuement
sa force, il ot proffitable conseil. A luy vint et luy chay aux piés en
moult grant humilité par semblant, et luy pria moult qu'il eust de luy
mercy. Le roy qui moult estoit miséricors luy pardonna par telle condicion
que le duc promist que il amendroit au roy premièrement ce qu'il s'estoit
vers luy meffais, au jugement de sa court; et après qu'il rendroit aux
églyses et aux religions ce qu'il avoit pris du leur par mauvaise raison,
et qu'il en feroit plain restablissement au dit et à la volenté du roy.
Mais le roy qui assez aguement et cauteleusement regardoit à la fin de ses
besongnes et appercevoit bien que malice d'homme estoit moutipliée en
terre, et que toute pensée estoit ententive à mal, eschiva la malice du duc
au proffit de luy et des églyses; car il avoit à mains hommes qui par avant
avoient conversé entour son père le roy Loys de bonne mémoire oï dire, que
cil duc mesme l'avoit courroucié maintes fois. Quant il estoit ajourné aux
parlemens pour ses meffais il venoit à court, et promectoit amendement de
tous ses torfais, et d'obéir aux royaux commandemens, et que dès or en
avant se garderoit de mesprendre. Et puis quant il avoit ce passé et il
estoit retourné en Bourgoingne, si faisoit pis que devant né point ne
doubtoit à brisier son serement n'a courroucier le roy son seigneur.
De ceste chose fu garni le roy et introduit[43], avant que la paix feust
reformée. Pour ce prist le roy trois chasteaux très bons de luy par nom de
gaige, par tel convenant qu'il les devoit tenir tant qu'il eust rendu au
roy la dicte somme de deniers, c'est assavoir, trente milles livres. Mais
ne demoura pas longuement que le roy ot débonnaire conseil envers le duc
selon sa débonnaireté, et luy rendi les trois chasteaux qu'il tenoit de luy
en gaige. Quant la paix fu ainsi reformée, le roy s'en retourna à joie à
Paris en son palais.
Note 43: _Introduit._ Ce mot avoit autrefois le sens d'_instruit_.