_Coment le conte de Toulouse et le roy d'Aragon furent accordés
par miracle._
Guerre et dissensions qui long-temps avant avoient esté commenciées furent
renouvellées entre le conte Raimon de Saint-Gille et le roy d'Aragon, telle
que nul ne povoit mettre en eulx né concorde né paix. Pour quoy les povres
gens du pays estoient moult grevés par leur guerres; mais Nostre-Seigneur
qui oï la clameur et la complainte de ses povres leur envoia sauveur, non
mie empereur, roy, prince né prélat; mais un povre homme qui avoit nom
Durant à qui Nostre-Seigneur s'apparut en la cité de Nostre-Dame-du-Puy, et
luy bailla une cédule en quoy l'image de Nostre-Dame estoit escripte et
séoit en un trosne et tenoit la fourme son chier fils en semblance
d'enfant. En la circuité de son seel estoient lestres escriptes qui
disoient ainsi: «Aigneaulx de Dieu qui ostez les péchiés du monde,
donne-nous paix.»
Quant les grans princes et les meneurs et tout le peuple oïrent ceste
chose, il vindrent tous au Puy Nostre-Dame à la feste de l'Assumption,
ainsi comme il souloient venir chascun an par coustume. Quand le peuple fu
assemblé à la solempnité de la feste, l'évesque de la cité prist celluy
Durant qui estoit un povre charpentier, et l'establi emmy la congrégacion
pour dire le commandement Nostre-Seigneur. Quant il vit que tous ceulx qui
là estoient avoient les oreilles ententives à sa bouche, il commença à dire
son message, et leur commanda hardiement de par Nostre-Seigneur qu'il
féissent paix entre eulx, et en tesmoing de vérité leur monstra la cédule
que Nostre-Seigneur luy avoit bailliée, à tout l'image de Nostre-Dame qui
estoit dedens empreinte. Lors commencièrent de cuer à grans souspirs et à
moult grans larmes à louer la pitié et la miséricorde de Nostre-Seigneur,
et les deulx grans princes qui devant estoient en si grant guerre que nul
n'y povoit mettre paix, jurèrent sur les textes des évangiles, de bon cuer
et de bonne volenté, et luy promistrent fermement en nostre Seigneur qu'il
seroient tousjours mais en paix l'un vers l'autre. Et en signe et en
tesmoignage de celle réconciliation qu'il avoient faicte, il firent
empraindre en estain le seel de celle cédule, à tout l'image de
Nostre-Dame, et le portoient avecques eulx cousus sur chaperons blancs qui
estoient tailliés à la manière d'escapulaires que les convers de ces
abbaïes blanches portent. Et plus grant merveille: que tous ceulx qui ces
signeaux portoient estoient si seurs que s'il avenist par aventure qu'aucun
d'eulx eust un homme occis, et il encontrast le frère de celluy qui feust
mort et sceust bien encore la mort de son frère, il méist tout en oubli
pour luy festoier et le receust entre ses bras en baisier de paix, d'amour
et de larmes, et luy donnast à mengier et à boire en sa maison et toutes
ses nécessités. Celle paix qui fu faicte au païs par ce preud'homme dura
moult longuement.