_Coment il fu de rechief à Saint-Denis et se fist couronner, et du
trespassement son père.--Ce sont les fais du second an._
En l'an de l'Incarnacion mil cent quatre-vins, en la quarte kalende de
juing, droitement le jour de l'Ascension, ala le roy à Saint-Denys en
France, et se fist couronner de rechief devant le maistre autel de l'églyse
par le conseil d'aucuns preud'hommes et sages qui environ luy estoient. Le
jour meisme, espousa la noble roine Ysabel, fille Baudouin le comte de
Hainaut et niepce le conte Phelippe de Flandres qui en ce jour porta devant
le roy Joyeuse, l'espée du grant roy Charlemaine, si comme il est droit
acoustumé au couronnement des roys. Mais tandis comme le roy et la royne
estoient les chiefs enclins, à genous devant l'autel, et il entendoient la
bénéiçon des espousailles que Guy l'archevesque de Sens leur faisoit, en la
présence des barons et des prélas qui là estoient, advint une aventure qui
est bien digne de mémoire.
Tant y eut assemblé de peuple des chastiaux et des villes voisines pour
véoir la feste et la solempnité, et pour véoir le roy et la royne couronner
ensemble que trop y estoitgrant la presse et le tumulte du peuple. Pour
celle noise apaisier, et pour le murmure de la gent refrener se leva un
chevalier de la court du roy qui commença à tournoier parmi l'air une verge
qu'il tenoit en sa main. Ainsi comme il la démenoit despourvuement amont et
aval, il assena quatre des lampes d'utile d'olive qui pendent devant
l'autel, à un seul coup les brisa toutes quatre et respandi l'uille
droitement sur le chief le roy et la royne qui estoient à genoulx. Si ne
doit-on pas cuider que ceste chose avenist d'aventure; mais ainsi comme par
divine ordonnance en signe de plenté des dons du saint Esperit qui lui fu
d'amont transmis, à espandre et à mouteploier la gloire de son nom et la
renommée de ses fais par toutes terres. Dont il sembla assez proprement que
la parole que Salmon dist ès cantiques feust dicte pour luy, ainsi comme
s'il voulsist dire: «La gloire et la renommée et la sapience de ton nom
sera espandue de l'une mer jusqu'à l'autre.» Car par uille nous sont ces
trois choses signefiées: renommée, gloire et sapience. Et de ces trois
graces fut-il enluminé en toute sa vie; car il fu renommé par victoires,
glorieux en ses fais, sage en ce qu'il doubta Dieu, et en son royaume
sagement gouverner.
En cel an trespassa son père le bon roy Loys en la quarte kalende
d'octobre, à un jour d'un jeudi. A Paris fu mort qui est la maistre cité du
royaume. Si semble qu'il fust ordonné par divine provision que cil qui
estoit roy et chief du royaume de France, et qui sainctement avoit
tousjours vescu, trespassa du palais en palais, et du règne transitoire au
règne perpétuel que oeil ne vit né oreilles n'oïrent né cuer d'homme ne
pourroit penser, que Dieu appareilla à ceulx qui aiment vérité. Quant le
corps fu enbasmé et appareillié, il fu porté à l'abbaye de Barbéel qu'il
avoit fondée. La royne Ale sa femme fist faire sur luy une tombe d'or,
d'argent et de pierres précieuses de merveilleuse ouvrage et de riche.