_Coment l'évesque Daniel aporta le saint clou à Charlemaines; des loanges
et des graces que l'empereur rendoit à nostre Seigneur; et puis coment les
saintes reliques furent appareilliées pour apporter en France._
De celle place se départirent, et alèrent jusques au lieu, tout en
chantant, où les autres reliques estoient. L'évesque Daniel, qui estoit
esleu pour ce faire, prist le clou et l'aporta haultement à l'empereur
Charles. Cy endroit ne doit-on pas taire un beau miracle que nostre
Seigneur voult là faire par sa miséricorde; car tout ainsi comme il advint
quant les saintes espines flourirent, si comme vous avez oï, une odeur
espandit maintenant, de si merveilleuse doulceur, qu'elle ne raemplit pas
tant seulement les gens, mais toute la cité. Si estoit de si grant vertu,
que trois cens et un malades furent guaris en celle heurre de diverses
enfermetés, qui tous affermoient certainement qu'ils avoient tous santé
receue en une mesme heure de temps.
Un malade qui fu dessus les trois cens avoit langui près de trente ans en
trois manières de maladies; car il avoit la veue perdue et l'oïe et la
parolle; et disoit qu'il avoit premièrement receue la veue et après l'oïe,
et après la parolle, par la vertu nostre Seigneur. Et disoient avec le
prophète David: _Omnes gantes, plaudite manibus._ Si vault autant à dire en
françois, comme: «Toutes gens, esjouissez-vous; chantez à Dieu, en voix de
léesce, ceulx qui à luy ont espérance.» Et puis après si chantoient ce
seaume: _Suscepimus, Deus, miscricordiam tuam in medio templi tui._ Si
vault autant à dire en françois, comme: «Sire Dieu, nous avons reçeu ta
miséricorde, au milieu de ton temple.» Et celuy malade qui fut curé
par-dessus les trois cens affermoit la manière si comme il fu gari, et
asseignoit l'ordre de sa curacion selon l'ordre des trois miracles. Car
quant les espines de la sainte couronne furent hors, il recouvra la veue;
et quant le saint fust fu tranchié, il recouvra l'oïe. Et quant les espines
flourirent, il recouvra la parole; et quant le saint clou fu levé, ce
meisme miracle et plusieurs autres advinrent en diverses personnes. Et pour
ce que nous ne povons pas tous les miracles raconter qui là advinrent en
celle journée, nous en convient plusieurs laissier pour la confusion
eschiver.
Mais un n'en voulions pas laissier qui avint à un enfant. Cil enfant avoit
la senestre main et tout le cousté sec, dès le premier jour qu'il fu né; et
pour ce estoient les membres de l'autre part plus lens et plus paresseux.
Mais en celle heure que le saint clou fu trait hors de la boîte, et il eut
atouchié l'air, l'enfant recouvra plainement santé et vint en courant à
l'églyse, loant et glorifiant nostre Seigneur; et commença à conter, oyans
tous, la manière coment il eut esté guari. Il gisoit en son lit à heure de
nonne, en tel point qu'il ne dormoit né ne veilloit plainement; si luy
sembla qu'il véist devant luy un fevre blanc et chanu qui luy traioit parmi
le pié et parmi la main senestre une lance et un clou de fer. Et quant
l'enfant eut ce raconté, le clergié commença à haulte voix: _Te Deum
laudamus_. Et l'empereur Charles commença à chanter avec David le prophète:
_Manus tuoe, Domine, fecerunt me et plasmaverunt me. Da mihi intellectum ut
discam mandata tua_; et d'autres seaumes du Psautier. Si vault autant à
dire en françois comme: «Beau sire Dieu, qui me féis à fourme d'homme,
donne-moy entendement, et que je puisse entendre et apprendre tes
commandemens, et que je puisse monstrer à ton peuple d'Occident la mémoire
de ta glorieuse passion.»
Toutes ces reliques furent mises en divers sacs; chascun par soy, et puis
refurent mises ensemble en un grant sac de cuir de bugle que l'empereur
portoit attachié à son col. C'est assavoir la couronne d'espines, le saint
clou, une pièce du fust de la sainte croix, le suaire nostre Seigneur, la
chemise nostre Dame, qu'elle avoit vestue en celle heure qu'elle enfanta
nostre Seigneur sans peine, et la ceinture dont elle ceint nostre Seigneur
au bercel; et le bras destre saint Siméon, dont il receut nostre Seigneur
au jour qu'il fu offert au temple en Jhérusalem.