Note 554: _A chief de pièce._ Au bout du compte.
Note 555: _Voult_ ou _Volt_. Visage.
»Et pour ce que nous avons certainement enquis quel homme tu es et de quex
meurs et de quex faits, nous nous esjouissons en nostre Seigneur, et luy
rendons grâces en tes merveilleux faits, en ton humilité et en ta pacience.
Si suis en certaine espérance que la besoigne sera finée en prospérité par
tes mérites et par ton travail; car tu es deffendeur de paix, et la quiers
par grant désir; et quant tu l'as trouvée, tu la gardes et nourris en grant
amour et en grant charité.
»Saches-tu, très-chier sire, que les païens ont fait si très-grant honte et
si grant dommage à Dieu en Jhérusalem, que nul féal crestien ne le devroit
souffrir longuement; mais tu peux bien amender légièrement toutes ces
choses à l'aide nostre Seigneur; et pour ce qu'il ne semblast que nous
voulsissions soubsmettre[556] les mérites de ta charité, escripvons-nous
ces choses à toy que Dieu a sur tous esleu. Que te diroie-je plus? Tu as
moult de raisons par quoy tu dois tantost obéir au commandement nostre
Seigneur. Qui est cil qui tantost ne doie faire ce que Dieu luy mande?
Haste-toi donc, noble roy auguste, d'accomplir la volenté et le
commandement nostre Seigneur; que tu ne soyes coulpé vers luy de trop
longue demeure. Car cil qui va contre les commandemens de Dieu ne pourra
eschiver la coulpe de l'inobédience.»
Note 556: _Soubsmettre._ Ce mot signifie dédaigner, ne pas tenir
compte.