Au nouvel temps retourna l'empereur en la cité de Noion[459]. Là fist le
jeusne de la quarantaine et y célébra la Résurrection, et puis retourna à
Ais-la-Chapelle. Là luy fu nuncié que le roy Godefroy de Dannemarch estoit
entré ès contrées des Abrodiciens, qui estoient en son aliance aussi comme
en sa garde. Pour ceste besongne envoia Charlot son fils au fleuve d'Albe,
à tout grant ost des François et des Saisnes, et luy commanda qu'il
contrestast à ce roy forcené, s'il vouloit entrer en Sassoigne. Mais la
chose avint autrement: car il se tint grant pièce sur le fleuve d'Albe, et
prist aucuns des chasteaulx d'Esclavonnie; et au derrenier s'en retourna en
Dannemarch, au grand dommage de sa gent. Et tout eust-il chacié Dragon, le
duc des Abrodiciens, qui pas ne se fioit en son menu peuple, et eust-il
perdu un autre duc qui Gondelade avoit nom, et tout avoit-il fait deux
parties de la terre tributaire, si perdit-il toutes voies grant partie de
son ost, et un sien nepveu fils de son frère, et plusieurs autres hommes de
la cité qui furent occis à l'assault d'un chastel. Et Charlot, le fils de
l'empereur, qui contre luy avoit esté envoie, fist tandis un pont sur le
fleuve d'Albe, son ost conduisit oultre, au plus tost qu'il put, sur deux
manières de gens qui sont appelles Livons et Smelgilde, pour ce que ces
deux peuples s'estoient soubsmis et aliés aux Danois. Leurs régions
destruist et gasta. Le fleuve d'Albe trespassa et se retraist en Sassoigne.