Après ces choses, Guinigise que Grimoart eut pris fu rendu.
En ce point retournèrent les messages de l'empereur qu'il avoit envoiés en
Constantinoble; si vindrent avec eulx les messages Nicephore l'empereur qui
lors gouvernoit l'empire, car les Grieux avoient déposé Hélaine
l'emperéris, quant les messages l'empereur Charlemaines furent là venus.
Ces messages estoient ainsi nommés: Michiau Pierre et Calixte. En ce point
qu'ils vindrent, l'empereur en Alemaigne estoit sur le fleuve de Salas, en
un lieu qui a nom Salz. La forme de la pais pourquoy ils estoient venus
promistrent par ung escript.
Quant ils eurent demouré à court tant comme il leur plut, ils retournèrent
en Constantinoble et portèrent à leur seigneur l'epistre Charlemaines
l'empereur. Après ces choses s'en ala l'empereur Charlemaines en Bavière;
là ordonna ses besongnes de Pannonie, et puis retourna à Ais-la-Chapelle au
mois de décembre; là demeura toute la saison et y célébra la Nativité de
nostre Seigneur Jhésu-Crist.