_Coment il envoia ses osts sur les Bretons, et coment il ala à Rome, et
coment il conquit Puille et Calabre. Et des messages Thassille le duc de
Bavière, que il envoia à l'apostole Adrien pour confermer le païs de leur
seigneur et du roi. Puis après coment il retourna en France._
[354]Quant l'yver fu trespassé et la nouvelle saison venue, le roy célébra
la Résurrection en la ville d'Atigny, après appareilla ses osts pour
ostoier en Bretaigne:[355] la Bretaigne petite est appellée à la différence
de la grant Bretaigne qui maintenant est nommée Angleterre. Si veullent
aucuns dire cy endroit que celle gent retiennent la langue bretonne des
anciens Bretons. Car quant les Anglois qui d'une partie de Sassoigne qui a
nom Angle vindrent eurent celle Bretaigne prise, ils tuèrent et chacièrent
les Bretons de celle isle et d'eus vindrent les Anglois. Lors s'enfouit une
partie de la gent du païs, la mer passèrent et vindrent habiter ès
derraines parties de France, par devers Occident. Et celle gens appellés
sont Bretons bretonnans[356]. Ce peuple fut jadis conquis et tributaire du
roy Dagobert. Et pour ce qu'ils ne vouloient jamais obéir, le roy[357] y
envoya Adulphe un des princes de son palais, à grant ost. En pou de temps
après reffraint et abaissa leur présumpcion; leurs ostages et plusieurs de
leurs nobles hommes amena au roy qui luy firent hommage et obéissance pour
le commun du païs.