_Comment Ebroin fu mestre du palais le roy Theoderic et comment il fist
martirier saint Ligier évesque d'Ostun_.
[44]Au tems de ce roy Loys avinrent moult de pestilences au royaume de
France. De cestuy roy Loys puet-l'on plus dire de mal que de bien: tout
fust-il assez dévot aus églyses des saints et des saintes; néantmoins
eut-il en lui tant de vices que ils étaingnirent les vertus, s'elles y
furent: abandonné fu à toute ordure de péchié, à fornicacion, à gloutonnie,
à yvresce; et si fu despiseur de femmes. Et ne recorde pas l'histoire que
sa vie né ses faits feussent dignes de loenge et de mémoire; car maint
acteurs d'histoires le mettent à damnacion, pour ce que ils ne sevent la
fin de son péchié. Ainsi dist-on de lui une chose et autres, mais nul n'en
parole fors en doutance. Trois fils eut de la royne sainte Baltheur:
Clotaire, Childeric et Theoderic. Mors fu en l'an de l'incarnation six cent
soixante-deus, et de son règne le dis-sept, ensépulturé fu en l'églyse
Saint-Denis avec son père. La royne sainte Baltheur sa femme fonda en son
tems l'abaïe Saint-Pierre de Corbie et celle de Chelle-les-Nonains en
laquelle elle gist corporelment. [45]En ce tems morut Herchinoal le mestre
du palais.
Note 44: _Gesta regum, cap_. 44.
Note 45: _Gesta regum, cap_. 45.
Après la mort le roy Loys couronnèrent les François Clotaire, l'aisné des
trois fils; si gouverna le royaume entre lui et sa mère la royne Baltheur.
[46]Lors furent les François en doute de qui ils feroient mestre du palais.
En la parfin en eslurent un qui avoit nom Ebrouin. (Ce fu celui qui fist
martirier monseigneur saint Ligier l'évesque d'Ostun.) Le roy Clotaire
morut, quant il eut quatre ans régné[47]. Lors couronnèrent les François le
mainsné qui avoit nom Theoderic; Childeric le troisième envoièrent en
Austrasie avec le duc Vulphoal pour le royaume recevoir. [48]Dès lors
commença le royaume de France à abaissier et à décheoir, et le roy à
fourlignier du sens et de la puissance de ses ancesseurs. Si estoit le
royaume gouverné par chambellens et par connestables qui estoient apelés
mestres du palais; et les roys n'avoient tant seulement que le nom et de
rien ne servoient[49] fors de boire et de mengier. En un chastel ou en un
manoir demouroient toute l'année jusques aux calendes de may. Lors issoient
hors en un char pour saluer le peuple et pour estre salué d'eus, dons et
présens prenoient et aucuns en rendoient, puis retournoient à l'hostel et
estoient ainsi jusques aus autres calendes de may. [50]Cet Ebrouin mestre
du palais fist tant que les François le cueillirent en grant haine pour son
orgueil et pour sa desloiauté, et le roy Theoderic aussi qui les grevoit
par son conseil[51]: agais leur bastirent, une heure, et les prirent tous
les deux; Ebrouin tondirent etl'envoièrent en une abaïe de Bourgoigne qui a
à nom Luxovion[52]. Le roy Theoderic chacièrent de France, et aucunes
croniques[53] dient que ils le tondirent aussi en l'abaïe Saint-Denis.