Puer natus in Bethlehem,
Unde gaudet Jerusalem.
Hic jacet in praesepio,
Qui regnat sine termino.
Cognovit bos et asinus
Quod puer erat Dominus.
Reges de Sabâ veniunt,
Aurum, thus, myrrham offerunt.
Intrantes domum invicem
Novum salutant principem.
De matre natus virgine
Sine virili semine;
Sine serpentis vulnere
De nostro venit sanguine;
In carne nobis similis
Peccato sed dissimilis;
Ut redderet nos homines
Deo et sibi similes.
In hoc natali gaudio
Benedicamus Domino:
Laudetur sancta Trinitas,
Deo dicamus gratias.