查察社嘅意思，係平水土嘅官，稷係教子民耕种嘅官。今下世间人，将社稷两只字，共做一句来讲。查考稷嘅来历，係黄帝嘅孙，文王十代嘅祖公，其名喊做亚弃，才学十分广究，看地方高低燥湿，种植蔬菜，又极哙耕种五谷。在尧舜嘅当时，做农稷嘅官职教子民耕田，自该时子民，正得倒衣食，故所以人称其名后稷。佢教子民耕种，本来係有益畀人。但係佢冇能为，使倒年成丰熟，好事嘅人。称佢做五谷神，求佢保佑田园茂盛，五谷丰登。这等人，满下唔识生物养人嘅活神，来拜先代嘅人为神。殊不知后稷係上帝所生，畀等智慧佢，来教子民。书中有话：“郊社嘅礼，所以祀上帝也。”唔曾讲祀后稷，郊坛圆祀郊，係报答上帝造天嘅功劳；社坛方，祀社，报答上帝造地嘅功劳。上帝管风雨、田园、菜蔬、五谷、样事、係天地人物嘅大主宰。