客问：真神上帝，係全备尽善，生倒万物来养人。样边讲，又生倒等极恶嘅野兽、毒蛇、虫豸、来害人呢？
答曰：这等极恶嘅野兽，与毒蛇虫豸，虽然佢哙害人，但係也可以有益畀人，不过吾等嘅智慧见识，十分浅薄，唔知其益处来用唔止。汝等爱查察下子，这世界上有好多人，将该等虎骨与熊胆，用佢来做药，又用蜈蚣虫与蝎子来医病。可见真神上帝，所造各样生物係想表明白，佢係无所不能，将各样至好嘅生物满在这天下。好比有光有暗，就成得日晨头与晚晨头。设使有光冇暗，样边分得出昼夜呢？有白冇乌，样边分得出彩色呢？有甜冇苦，又样边分得出五味呢？故所以各样物件之中，唔论大小好丑，满下也係有益畀唔等。有善兽可以帮助吾等，修心积德来受上帝嘅赏；有恶兽可以责备吾等嘅罪，怕受上帝嘅谪罚。可知人就爱查察其嘅理由，唔好怨恨上帝，生倒恶兽来害人啰。