Der _kam_ en Trold fræ Daabjærgdojs:
_Klump_ -- Dump! _Hump_-i-Skump!
med Øwn saa glown som en Vækildsblojs,
for _han_ maatt ha Brændvin far Awten!
For haar en Trold begynd aa drikk,
Klump -- Dump! Hump-i-Skump!
saa tøster han warr end Kow og Krikk,
der trækkes te Trow om æ Awten.
Og po æ Pukkel af den Hallunk,
Klump -- Dump! Hump-i-Skump!
dér hopped og danst en Brændvinsdunk
saa huel som æ Suel under Awten.
Og søen han traj gjemmel Hønemues --
Klump -- Dump! Hump-i-Skump!
te æ Wand gik owenind a' hans Hues
og nejenud indte Awten.
Saa fløw han da hen gjemmel Daabjærg Graw
Klump -- Dump! Hump-i-Skump!
saa æ Præjst kam ud uden Lu heller Kraw
og tint, han sku himl inden Awten.
Saa _to_ æ Skjevl te aa pin og spring,
Klump -- Dump! Hump-i-Skump!
te æ Klokk begynd i æ Torn aa swing
og trowr, æ Degn rind te Awten.
Og søen han traj gjemmel Ingedaal,
Klump -- Dump! Hump-i-Skump!
te aal dje Kokk de saatt sæ po æ Haal
og kund ett find te Raan mud æ Awten.
Ja, søen han stamped ved Sjørrup Kjar,
Klump -- Dump! Hump-i-Skump!
te Pæ Smed trimmelt om baag æ Krowmands Dar
og kam ett te hans Ved inden Awten.
Saa _kam_ han slamprend sønden om Vrow,
Klump -- Dump! Hump-i-Skump!
te æ Hejst' gik baglæns med Harrer og Plow,
og kam laask ad æ Gord inden Awten.
Og Koldkur Hus fæk han søen te aa wakk,
Klump -- Dump! Hump-i-Skump!
te Jens Bruus hwyst Bagkorre nied ad en Bakk
og end i en Grôf henad Awten.
Hans Træsko de war saa faale tarr,
Klump -- Dump! Hump-i-Skump!
men hans Nies og Ører haaj æ nø warr,
for _de_ sto i Døj under Awten.
Saa _laa_ han da Damp mod en vilre Krowr:
Klump -- Dump! Hump-i-Skump!
og det war sgi der, hwor Kræn Haabro bowr,
og stapper hans Pief imud Awten.
Saa fløw han da ind imell Haabro Hus,
Klump -- Dump! Hump-i-Skump!
te æ Drikkels ret blarped a Kopp og a' Krus
og Kræn Haabro glemt hans: Godawten!
Æ Krowmands Dar røw han løs fræ si Fals,
Klump -- Dump! Hump-i-Skump!
og æ Darkam hænd om æ Bjærmands Hals,
da han sto i æ Stow imud Awten.
Og nu begynd da æ Skinting aa drikk,
Klump -- Dump! Hump-i-Skump!
saa læng te han _kund_ bælg i sæ for Hikk,
for _de'_ el jo komm ad æ Awten.
En trørr Pots Anker med jawnhen Øl --
Klump -- Dump! Hump-i-Skump!
den tæmt æ Skuel som en Fingerbøl
og rat atter mie inden Awten.
Og band en Spuns ham lovle haadt,
Klump -- Dump! Hump-i-Skump!
han stemt'en ind med hans Tommeltot,
saa det prost i hans Skjek under Awten.
Og Rumpunsflasker, de stur som smô --
Klump -- Dump! Hump-i-Skump!
-- han knak dje Hals mud hans sture Tô,
som en knækker en Lopp imud Awten.
Hwer Brændvinsbimpel, hwer Vinglajsdrep
Klump -- Dump! Hump-i-Skump!
-- han suet æ ud te den sidste Sep,
som en Snog suer Dôg om æ Awten.
Der bløw ikki en Droef te aa drikk heller spild,
Klump -- Dump! Hump-i-Skump!
og æ Wand det sak nok en Al i dje Kjeld,
og Folk war swær ædru -- en Awten.
Men no begynd sgi æ Bjærmand aa dryw;
Klump -- Dump! Hump-i-Skump!
tho far maatt han traw, men no ku han flyw
og now Daabjærgdojs inden Awten.
Saa drøw som en Torren han Øster opo
Klump -- Dump! Hump-i-Skump!
Hans Skjek det slævt saa laang ad æ O,
som en Togger slæver mud Awten.
[Anm.:
_Øwn_, Øjne; _glown_, glødende; _Vækildsblojs_, Valborgblus;
_haar_, har; _warr_, værre; _Trow_, Vandtrug;
_huel_, rund og buget; _Suel_, Sol;
_traj_, traadte; _Hues_, Hose; _nejenud_, nedenud;
_Daabjærg Graw_, Daugbjærg Kalkgrave; _Lu_, Hue;
_æ Skjevl_, Raden; _aa pin og spring_, løbe af al Magt; _Torn_,
Taarn; _rind_, ringede;
_saat sæ po æ Haal_, satte sig paa Halen; _Raan_, Rane, Hønsenes
Pind;
_søen_, saadan; _Kjar_, Kjær; _hans Ved_, Samlingen;
_slamprend_, om plump Løb og Gang; _Harrer og Plow_, Harver og
Plove; _laask_, løbsk; _Gord_, Gaardene;
_wakk_, bæve; _hwyst Bagkorre_, slog Kulbøtter; _Grôf_, Grøft;
_faale tarr_, særdeles tørre; _Nies_, Næse; _haaj æ nø warr_,
havde det betydeligt værre; _i Døj_, i Dynd;
_laa Damp_, satte Kursen af al Kraft; _en vilre Krowr_, en anset
Kro; _Pief_, Pibe;
_æ Drikkels_, Drikkevarerne; _blarped_, skvulped;
_hænd_, hængte; _æ Stow_, Stuen;
_æ Skinting_, Asnet;
_trørre_, tredive; _jawnhen_, ret godt; _tæmt_, tømte; _æ Skuel_,
Kjæltringen; _rat_, rakte;
_stemt_, trykkede;
_To_, Taa;
_Sep_, Draabe;
_ikki_, ikke, en Forstærkning af _ett_. _Droef_, Draabe; _sak_,
sank; _dje Kjeld_, deres Brønd;
_dryw_, drive, rave; _Dojs_, Daas, Høj;
_Torren_, Torden; _opo_, paa; _Skjek_, Skjæg; _æ O_, Aaen; _æ
Togger_, Fiskevaad.]
29/5 1910.