Ja, far der war en Stien a' _Skyw_,
laant far, laant far -- hwi skuld a lyw? --
_Kræn Hendrisen_ den Stien ku klyw,
far _Søren Sme_ en Skow ku byw,
og far _æ Lærki_ han ku flyw,
far _Bette Drejs_ -- _det_ bette Splejs --
war bløwn saa stur, som han ku blyw,
-- far _Laang Margreth_ ku stikk med Knyw,
far _Kræn den Fjar_ haaj mist æ Yw,
far _Gorm hans gammel_ Bjen bløw styw,
ja osse far -- det tær a skryw --
_Methuselem_ ku løwt en Ryw, --
far _Abraham_ ku tæl te tyw,
far _Dawed Kong_ med Lamm ku dryw,
halvminder kikk i Pagtens Ark,
da lô dér po mi Faars Mark
de tow ærværdig gammel Hyw!
[Anm.:
_Kaphyw_, to Høje paa min Fødegaards Mark; _Skyw_, Kjøbstaden
Skive; _laant far_, langt før; _Kræn Hendrisen_ kjendt Stenhugger;
_Skow_, Sko; _æ Lærki_, en Original, som antoges for Troldmand;
_løwt en Ryw_, løfte en Rive; _halvminder_, langt mindre.]
26/2 1910.