messagiers de France, et prisent congiet au roy et à
tout son conseil; mais ançois il leur couvint disner
ens ou palais de Wesmoustier. Et les festia là li dis
rois moult grandement, et leur donna au departir,
pour l'onneur et amour dou roy de France, son cousin, 25
grans dons et biaus jeuiaus. De puis ce fait, il
ne sejournèrent gaires de temps à Londres et s'en
partirent. Et esploitièrent tant par leurs journées
qu'il revinrent en France, et droitement à Paris, où
il trouvèrent le dit roy Phelippe, à qui il comptèrent 30
toutes leurs nouvelles, et comment il avoient esploitié,
et en quel estat il estoient parti dou dit roy
d'Engleterre, et ossi com grandement et honnourablement
il les avoit receus, et, à leur departement
et congiet prendre, donné de ses biens. De toutes
ces coses et esplois se contenta grandement li rois
Phelippes, et dist que moult volentiers il veroit le 5
roy Edouwart d'Engleterre, son cousin, car onques
ne l'avoit veu.
Ces nouvelles s'espardirent parmi le royaume de
France, que li rois d'Engleterre devoit venir en
France, et faire hommage au dit roy. Si se ordonnèrent 10
et apparillièrent moult richement et très
poissamment duch et conte de son sanch, qui le
desiroient à veoir. Et proprement li rois de France
en escrisi au roy Charle de Behagne, son cousin, et
au roy Loeis de Navare, et leur segnefia le certain 15
jour que li rois d'Engleterre devoit estre devers lui,
et leur pria que il y vosissent estre. Cil doi roy, ou
cas que priiet en estoient, ne l'euissent jamais lassiet,
et se ordonnèrent au plus tost qu'il peurent, et
vinrent en France en grant arroy devers le roy. Li 20
rois de France fu adonc consilliés que il recueilleroit
le dit roy d'Engleterre, son cousin, en le bonne
cité de Amiens. Si fist là faire ses pourveances
grandes et grosses, et aministrer salles, cambres,
hostelz et maisons pour recevoir lui et toutes ses 25
gens, où il se comptoit, parmi le roy de Behagne et
le roy de Navare qui estoient de se delivrance, et le
duch de Bretagne, le duch de Bourgongne, le duch
de Bourbon, à plus de trois mille chevaus, et li rois
d'Engleterre, qui y devoit venir à sis cens chevaus. 30
Il avoit adonc à Amiens, et a encores bien, cité pour
rechevoir aisiement otant de princes et leurs gens et
plus assés. Or parlerons dou roy d'Engleterre, qui
passa le mer, et vint en celle anée, l'an mil trois
cens vingt neuf, environ le mi aoust, en France.
§ 45. Li jones rois d'Engleterre ne mist mies en
oubli le voiage que il devoit faire ens ou royaume 5
de France, et se appareilla bien et faiticement, et si
souffissamment que à lui apertenoit et à son estat;
si se parti d'Engleterre, quant jours fu dou departir.
En se compagnie avoit deus evesques, cesti de Londres
et cesti de Lincolle, et quatre contes, monsigneur 10
Henri conte Derbi, son cousin germain, fil
monsigneur Thumas de Lancastre au Tors Col, le
conte de Sallebrin, le conte de Warvich, et le conte
de Herfort; sis barons, monsigneur Renault de Gobehem,
monsigneur Thumas Wage, mareschal d'Engleterre, 15
monsigneur Richart de Stanfort, le signeur
de Persi, le signeur de Mauné et le signeur de Montbray,
et plus de quarante aultres chevaliers. Si estoient
en le route et à le delivrance dou roy d'Engleterre
plus de mille chevaus, et misent deus jours 20
à passer entre Douvres et Wissan. Quant il furent
tout oultre, et leurs chevaus trais hors des nés et des
vaissiaus, li rois monta acompagniés, ensi que je
vous ay dit, et chevauça tant que il vint à Boulongne,
et là fu il un jour. 25
Tantos nouvelles vinrent au roy Phelippe de France,
et as signeurs de France, qui jà estoient à Amiens,
que li rois d'Engleterre estoit arrivés et venus à Boulongne.
De ces nouvelles eut li rois Phelippes grant
joie, et envoia tantos son connestable et grant fuison 30
de chevaliers devers le roy d'Engleterre, lequel
il trouvèrent à Monstruel sus Mer; et là eut grans
recognissances et approcemens d'amour. De puis
chevauça li jones rois d'Engleterre en le compagnie
del connestable de France; et fist tant o toute se route
que il vint en le cité d'Amiens, où li rois Phelippes 5
estoit tous appareilliés et pourveus de lui rechevoir,
le roy de Behagne, le roy de Navare et le roy de
Mayogres dalés lui, et si grant fuison de dus, de
contes et de barons que merveilles seroit à recorder.
Car, là estoient tout li douze per de France venu, 10
pour le roy d'Engleterre festoiier, et ossi pour estre
personelment, et faire tesmoing à son hommage. Se
li rois Phelippes reçut honnourablement et grandement
le jone roy d'Engleterre, son cousin, ce ne fait
mies à demander; et ossi fisent tout li roy, li duc et 15
li conte qui là estoient. Et furent tout cil signeur
adonc, en le cité d'Amiens, jusques à quinze jours.
Là en dedens eut tamainte parolle et ordenance
faite et devisée. Et me samble que li rois Edouwars
d'Engleterre fist adonc hommage, de bouce et de 20
parolle tant seulement, sans les mains mettre entre
les mains dou roy de France, ou prince ou prelat
deputé de par lui. Et n'en volt adonc li dis rois
d'Engleterre, par le conseil qu'il eut, dou dit hommage
proceder plus avant, si seroit retournés en Engleterre 25
et aroit veus, leus et examinés les previlèges
de jadis, qui devoient esclarcir le dit hommage, et
moustrer comment et de quoi li rois d'Engleterre
devoit estre homs au roy de France. Li rois de
France, qui veoit le roy d'Engleterre son cousin jone, 30
entendi bien toutes ces parolles, et ne le volt adonc
de riens presser, car bien savoit assés que bien y
recouveroit, quant il vorroit, et li dist: «Mon cousin,
nous ne vous volons pas decevoir, et nous plaist
bien ce que vous en avés fait à present, jusques à
tant que vous serés en vostre pays et enfourmés, par
les seelés de vostres predicesseurs, quel cose vous en 5
devés faire.» Li rois d'Engleterre respondi: «Chiers
sires, grans merchis.»
De puis se jeua, esbati et demora li rois d'Engleterre
avoecques le roy de France, en le cité d'Amiens.
Et quant tant y eut esté que bien deubt par raison 10
souffire, il prist congiet et se departi dou roy moult
amiablement, et de tous les aultres princes qui là estoient,
et se mist au retour pour revenir en Engleterre.
Et rapassa le mer, et fist tant par ses journées
qu'il vint à Windesore, là où il trouva la royne 15
Phelippe sa femme qui le rechut liement, et qui li
demanda nouvelles dou roy Phelippe, son oncle, et
de son grant linage de France. Li rois, ses maris,
l'en recorda assés et dou grant estat qu'il avoit trouvet,
et comment on l'avoit recueilliet et festiiet grandement, 20
et des honneurs qui estoient en France, as
quèles dou faire ne de l'entreprendre à faire, nulz
aultres pays ne s'apertient.
§ 46. Ne demora gaires de temps, puissedi, que
li rois de France envoia en Engleterre, de son plus 25
especial conseil, l'evesque de Chartres et l'evesque
de Biauvais, et ossi monsigneur Loeis de Clermont,
duch de Bourbon, le conte de Harcourt et le conte
de Tankarville, et des aultres chevaliers et clers en
droit, pour estre as consaulz le roy d'Engleterre, qui 30
se tenoient à Londres sus l'estat que vous avés oy,
ensi que li rois d'Engleterre, lui revenut en son pays,
devoit regarder comment anchiennement si predicesseur,
de ce qu'il tenoient en Aquitainnes et dont
il s'estoient appellé duch, en avoient fait hommage.
Car jà murmuroient li pluiseur en Engleterre que 5
leurs sires estoit plus proçains de l'iretage de France
que li rois Phelippes. Nequedent, li rois d'Engleterre
et ses consaulz ignoroient de toutes ces coses. Mais
grant parlement et assamblées sus le dit hommage
furent en celle saison, en Engleterre. Et y sejournèrent 10
li dessus dit envoiiet dou roy de France, tout
l'iver, et jusques à l'issue dou mois de may ensievant,
qu'il ne pooient avoir nulle diffinitive response.
Toutes fois, finablement, li rois d'Engleterre,
par l'avis de ses privilèges as quels il ajoustoit grant 15
foy, fu consilliés de escrire ensi lettres pattentes,
seelées de son grant seel, en recognissant l'ommage
tel qu'il le doit et devoit adonc faire au roi de
France; la quèle teneur de la lettre s'ensieut ensi:
§ 47. «Edouwars, par la grasce de Dieu roys d'Engleterre, 20
signeur d'Irlande et dux d'Aquitainnes, à
tous ceulz qui ces presentes lettres veront et oront,
salut. Savoir faisons, comme nous feissons à
Amiens hommage à excellent prince nostre chier
signeur et cousin Phelippe roy de France, lors 25
nous fu dit et requis de par lui que nous recognissions
le dit hommage estre lige, et que nous, en
faisant le dit hommage, li promissions expressement
foy et loyauté porter, la quèle cose nous ne
fesimes pas lors, pour ce que nous estions enfourmés 30
que point ne se devoit ensi faire. Et fesimes
lors au dit roy de France hommage par parolles
generales, en disant que nous entrions en son
hommage, par ensi comme nostre predicesseur,
dux de Giane, estoient de jadis entrés en l'ommage
des rois de France, qui avoient esté pour le 5
temps. Et, de puis enchà nous soions bien enfourmés
et acertenés de la vérité, recognissons, par
ces presentes lettres, que le dit hommage que nous
fesimes à Amiens au roy de France, comment que
nous le fesimes par parolles generales, fu, est et 10
doit iestre entendu lige, et que nous li devons foy
et loyauté porter, comme dux de Aquitainne et
pers de France, et contes de Pontieu et de Moustruel.
Et li prommetons des or en avant foy et
loyauté porter. 15
«Et pour ce que ou temps à venir de ce ne soit
jamais descors ne question à faire le dit hommage,
nous prommetons en bonne foy, pour nous et nos
successeurs, dus de Giane, qui seront pour le
temps, le dit hommage se fera en ceste manière. 20
Li rois d'Engleterre, dux de Gyane, tenra ses
mains entre les mains dou roy de France. Et cilz
qui adrecera les parolles au roy d'Engleterre, dux
d'Aquitainne, et qui parlera pour le roy de France,
dira ensi: «Vous devenés homme lige au roy de 25
France, mon signeur, qui ci est, comme dus de
Gyane et pers de France, et li prommetés foy et
loyauté porter. Dittes: _voire_.» Et li rois d'Engleterre,
duch de Giane, et si successeur diront:
_voire_. Et lors li rois de France recevera le dit roy 30
d'Engleterre et duch de Gyane au dit hommage
lige, à la foy et à la bouce, sauf son droit et l'autrui.
De rechief, quant le dit roy et duch entera
en l'ommage dou roy de France, et de ses successeurs
rois de France, pour la conté de Pontieu et
de Moustruel, il mettera ses mains entre les mains
dou roy de France. Et cils qui parlera pour le roy 5
de France, adrecera ses parolles au dit roy et duc,
dira ensi: «Vous devenés homme lige au roy de
France, mon signeur, qui ci est, comme contes de
Pontieu et de Moustruel, et li prommetés foy et
loyauté porter. Dittes: _voire_.» Et le dit roy et 10
duch, conte de Pontieu, dira: _voire_. Et lors li dis
rois de France recevera le dit roy et conte au dit
hommage lige, à la foy et à la bouche, sauf son
droit et l'autrui.
«Et ossi sera fait et renouvelé, toutes fois que 15
l'ommage se fera. Et de ce baillerons nous et nos
successeurs, dux de Giane, fais les dis hommages,
lettres patentes seelées de nostres grans seaulz, se
le roi de France le requiert. Et avoech ce nous
prommetons tenir et garder affectuelment les pais 20
et acors fais entre les rois de France et dus de
Giane. Et en ceste manière sera fait, et seront renouvelées
les dittes lettres par les dis rois et dus
et leurs successeurs, dux de Giane et contes de
Pontieu et de Moustruel, toutes les fois que le roi 25
d'Engleterre, dus de Giane, et ses successeurs, dux
de Giane et contes de Pontieu et de Moustruel, qui
seront pour le temps, enteront en l'ommage dou
roy de France, et de ses successeurs, rois de France.
En tiesmoing des quèles coses, à cestes nos avons 30
fait mettre nostre grant seel. Données à Eltem, le
trentisme jour de marc mil trois cens et trente.»
Ces lettres raportèrent en France li dessus nommet
signeur, quant il se departirent d'Engleterre, et
il eurent le congiet dou roy; et les baillièrent au roy
de France, qui tantost le[s] fist porter à se cancelerie,
et mettre en garde, avoec ses plus especiaulz coses, 5
à le cautèle dou temps à venir. Nous nos soufferons
à parler dou roy d'Engleterre un petit, et parlerons
d'aucunes aventures qui avinrent en France.
§ 48. Li homs del monde, qui plus aida le roy
Phelippe à parvenir à le couronne de France, ce fu 10
messires Robers d'Artois, qui estoit li uns des plus
haus barons de France, le mieus linagiés et estrais
des royaus. Et avoit à femme la sereur germainne
dou dit roy Phelippe. Et avoit toutdis esté ses plus
especiaulz compains et amis en tous estas. Et fu, 15
bien l'espasse de trois ans, que en France estoit tout
fait par lui, et sans lui n'estoit riens fait. Apriès,
avint que li rois Phelippes emprist et acqueilla ce
monsigneur Robert d'Artois en si grant hayne, en
l'ocquison d'un plait qui esmeus estoit devant lui, 20
dont la conté d'Artois estoit cause, que li dis messires
Robers voloit avoir gaagnié, par le vertu d'une
lettre que messires Robers mist avant, qui n'estoit
mies bien vraie, si com on disoit, que, se li dis rois
l'euist tenu en son aïr, il l'euist fait morir sans nul 25
remède. Et comment que li dis messires Robers fust
li plus proçains de linage et d'amour à tous les haus
barons de France, et serourges au dit roy, se li couvint
il vuidier France, et venir à Namur dales le jone
conte Jehan, son neveu, et ses frères, qui estoient 30
enfant de sa sereur. Quant il fu partis de France, et
li rois vei que il ne le poroit tenir, pour miex moustrer
que la besongne li touchoit, il fist prendre sa
suer, qui estoit femme au dit monsigneur Robert et
ses deus filz, ses neveus Jehan et Charle; si les fist
mettre en prison bien estroitement, et jura que jamais 5
n'en isteroient, tant qu'il viveroit. Et bien tint
ce sierement, car onques de puis, pour personne
qui en parlast, il n'en vuidièrent, dont il en fu de
puis moult blasmés en derrière.
Quant li dis rois de France sceut de certain et fu 10
enfourmés que messires Robers d'Artois estoit arrestés
à Namur dalés ses sereurs et ses neveus, il en fu
moult courouciés. Et envoia caudement devers l'evesque
Aoulz de Liège, en priant qu'il deffiast et
guerriast le conte de Namur, se il ne mettoit huers 15
de son pays monsigneur Robert d'Artois. Cilz evesques,
qui moult amoit le roy de France, et qui petit
amiroit ses vosins, manda au jone conte de Namur
que il mesist ensus de lui son oncle, monsigneur
Robert d'Artois; aultrement il li feroit guerre. Li 20
contes de Namur fu si consilliés que il mist hors de
sa terre son oncle. Ce fu moult à envis, mais faire li
couvenoit ou pis attendre.
Quant messires Robers d'Artois se vei en ce parti,
si fu moult angousseus de coer, et se avisa que il 25
iroit en Braibant, pour tant que li dus, ses cousins,
estoit si poissans que bien le soustenroit. Si vint devers
le duch, son cousin, qui le reçut moult liement,
et le reconforta de ses destourbiers. Li rois le sceut,
si envoia tantost messages au dit duch, et li manda 30
que, se il soustenoit ou souffroit à demorer ne à repairier
en sa terre monsigneur Robert d'Artois, il
n'aroit pieur ennemit de lui, et le greveroit et porteroit
damage en toutes les guises qu'il poroit. Li
dus ne le volt ou n'osa plus soustenir ouvertement
en son pooir, pour doubtance que de avoir et acquerre
le hayne dou dit roy de France. Ains l'envoia 5
couvertement tenir en Argentoel, jusques à tant que
on verroit comment li rois s'en maintenroit.
Li rois le sceut, qui par tout avoit ses espies; s'en
eut grant despit. Si pourcaça tant, en moult brief
temps, que li rois de Behagne, qui estoit cousins 10
germains au dit duc, li evesques de Liège, li arcevesques
de Coulongne, li dus de Guerles, li marchis
de Jullers, li contes de Bar, li contes de Los, li sires
de Faukemont, et pluiseur aultre signeur furent tout
alloiiet contre le dit duch, et le deffiièrent tout, au 15
pourcach et requeste del dessus dit roy. Et entrèrent
tantost en son pays parmi Hesbaing, et en alèrent
droit à Hanut. Et ardirent à leur volenté par deus
fois, demorant ens ou pays, tant que bon leur sambla.
Et envoia avoech yaus li dis rois le conte d'Eu, 20
son connestable, à tout grant compagnie de gens
d'armes, pour miex moustrer que la besongne estoit
sienne, et faite à son pourcach, et tout ardant son
pays.
Si en couvint le conte Guillaume de Haynau ensonniier; 25
et envoia ma dame sa femme, sereur au
roy Phelippe, et le signeur de Byaumont, son frère,
en France, par devers le dit roy, pour impetrer une
souffrance et une triewe de lui, d'une part, et dou
duch de Braibant, d'autre part. Trop à envis et à 30
dur y descendi le roy de France, tant avoit il pris la
cose en grant despit. Toutes fois, à le priière dou
conte de Haynau, son serourge, li rois s'umelia et
donna et acorda triewes au duch de Braibant, parmi
tant que li dus se mist dou tout en l'ordenance dou
propre roy de France et de son conseil, de tout ce
qu'il avoit à faire au roy et à çascun de ces signeurs 5
qui deffiiet l'avoient. Et devoit mettre, dedens un
certain jour, qui nommés y estoit, monsigneur Robert
d'Artois hors de sa terre et de son pooir, si com
il fist moult à envis; mais faire li couvint, ou autrement
il euist eu trop forte guerre de tous costés, si 10
com il estoit apparans: si ques, entrues que cil
toueillement et ces besongnes se portoient, ensi que
vous oés recorder, li rois englès eut nouvel conseil
de guerriier le roy d'Escoce, son serourge, je vous
dirai à quel title. 15
§ 49. Vous avés bien oy recorder chi dessus de le
guerre le roy Robert d'Escoce et dou roy d'Engleterre,
et comment unes triewes furent prises à durer
trois ans, là en dedens cilz rois Robers morut; en
apriès, dou mariage qui fu fais de la serour au roi 20
englès et dou fil ce roy Robert, qui fu rois d'Escoce
apriès le mort de son père, et le clamoit on le roy
David. Le temps que ces triewes durèrent, et encores
un an de puis ou environ, furent li Englès et li Escot
bien à pais, che que on n'avoit point veu en devant, 25
passet avoit deus cens ans, qu'il ne se fuissent
guerriiet et heriiet.
Or, avint que li jones rois d'Engleterre fu infourmés
que li rois d'Escoce, ses serourges, estoit saisis
de le bonne cité de Bervich, qui devoit estre de son 30
royaume, et que li rois Edouwars, ses taions, l'avoit
tous jours tenue paisevlement et francement, et ses
pères apriès, un grant temps. Et fu infourmés que li
royalmes d'Escoce mouvoit en fief de lui, et que li
jones rois d'Escoce, ses serourges, ne l'avoit encores
relevet ne fait hommage. Il en ot indignation, et envoia 5
assés tost apriès grans messages et souffissans au
jone roy David, son serourge, et à son conseil. Et li
fist requerre que il vosist oster se main de le bonne
cité de Bervich et lui resaisir, car c'estoit ses bons
hiretages, et avoit tous jours esté ses ancisseurs rois 10
d'Engleterre; et qu'il venist à lui, pour faire hommage
del royaulme d'Escoce, qu'il devoit tenir de
lui en fief.
Li jones rois David se consilla à ses barons et à
chiaus de son pays, par grant deliberation de conseil. 15
Et quant il fu assés consilliés sour ces requestes,
il respondi as messages et dist: «Signeur, jou et
tout mi baron nous mervillons durement de ce que
vous nous requerés, de par le roy nostre serourge.
Car nous ne trouvons mies à nos anciiens, ne ne tenons 20
que li royaumes d'Escoce soit de riens subgès
ne doit estre au roy d'Engleterre, ne par hommage,
ne autrement. Ne onques messires li rois, nos pères,
de bonne memore, n'en volt faire hommage à ses
ancisseurs, rois d'Engleterre, pour guerre que on l'en 25
fesist. Ossi, n'ai jou point conseil ne volenté dou
faire. En apriès, nos pères, li rois Robers conquist
la cité de Bervich, par droite guerre, sur le roy son
père, et le obtint comme son bon hyretage, tout le
cours de se vie. Et ossi le pense jou bien à tenir, et 30
en ferai mon pooir. Si vous requier que vous voelliés
priier au roi, cui sereur nous avons, qu'il nous voelle
laissier en celle franchise que no devantrain ont esté,
et goïr de ce que li rois, nos pères, conquist et maintint
toute se vie paisievlement, et que encontre ce
ne voelle croire nul mauvais conseil. Car, se uns
aultres nous voloit faire tort, si nous deveroit il aidier 5
à deffendre, pour l'amour de sa sereur cui nous
avons à femme.» Li message respondirent: «Sire,
nous avons bien entendu vostre response. Si le reporterons
volentiers à nostre signeur le roy, en tel
manière que dit l'avés.» Puis prisent congiet, et 10
revinrent arrière à leur signeur, le roy d'Engleterre,
et à son conseil. Si recordèrent toutes les parolles
que li jones rois d'Escoce avoit respondu à leur requeste.
Li quels rapors ne plaisi mies bien au roy
Edowart, ne à son conseil. Ains fist mander à Londres, 15
au jour de Parlement, tous les barons, chevaliers
et consaulz des bonnes villes de son royalme,
pour avoir sur ce conseil et meure deliberation.
Ce terme pendant, vint messires Robers d'Artois
en Engleterre, à guise de marcheant, qui estoit decaciés 20
dou roy Phelippe de France, si com vous avés
oy. Et li avoit li dus de Braibant, ses cousins, conseilliet
qu'il se traisist celle part, ou cas qu'il ne
pooit nulle part demorer paisievlement en France,
ne en l'Empire. Si le rechut li jones rois englès liement, 25
et le retint volentiers dalés lui et de son conseil.
Et li assena le conté de Ricemont, qui avoit esté
ses ancisseurs. Or me retrairai as dessus dis Parlemens,
qui furent à Londres, sus l'estat dou royaume
d'Escoce. 30
§ 50. Quant li jours de Parlement approça que
li rois englès avoit establi, et tous li pays fu assamblés
au mandement le roy à Londres, li rois leur fist
demoustrer comment il avoit fait requerre au roy
d'Escoce, son serourge, que il vosist oster se main
de le cité de Bervich qu'il detenoit à tort, et qu'il 5
vosist venir faire hommage à lui de son royalme
d'Escoce, ensi qu'il devoit; et comment li rois d'Escoce
avoit respondu à ses messages. Si pria à tous
que cescuns le volsist sour ce si consillier que sen
honneur y fust gardée. Tout li baron, li chevalier, 10
li consaulz des cités et des bonnes villes, et tous li
communs pays se consillièrent sur çou et raportèrent
leur conseil, tout d'un acord. Li quelz consaulz fu
telz que il leur sambloit que li rois ne pooit plus
porter par honneur les tors que li rois d'Escoce li 15
faisoit. Ains conseillièrent que il se pourveist si efforciement,
qu'il peuist entrer ou royaume d'Escoce
si poissamment, que il peuist ravoir la bonne cité
de Bervic, et qu'il peuist si constraindre le roy d'Escoce
qu'il fust tous joians, quant il poroit venir à son 20
hommage et à satisfation. Et disent qu'il estoient tout
desirant de aler avoech lui, à son commandement.
Li rois Edowars fu moult joians de celle response,
car il veoit le bonne volenté de ses gens. Si les en
regratia moult grandement, et leur pria que cescuns 25
fust apparilliés selonch son estat, et fuissent à un
jour, qui adonc fu nommés, droit à Noef Chastiel sur
Thin, pour aler reconquerre les droitures apertenans
à son royaulme d'Engleterre. Cescuns se habandonna
à celle requeste, et en rala en son lieu pour 30
lui pourveir, selonch son estat. Et li rois se fist pourveir
et apparillier si souffissamment que à tèle besongne
apertient. Si envoia encores aultres messages
à son dit serourge, pour lui souffissamment sommer,
et apriès pour deffiier, se il n'estoit aultrement consilliés.
§ 51. Li jours qui denommés estoit approça; et
vint li rois Edouwars, à tout son host, au Noef 5
Chastiel sour Thin. Si attendi par trois jours ses gens
qui venoient en siewant l'ost. Au quart jour, il s'en
parti et s'en ala à toute son host par devers Escoce,
et passa la terre le signeur de Persi et cesti de Noefville,
qui sont doi grant baron de Northombrelande, 10
et marcissent as Escos. Et ossi font li sires de Ros,
li sires de Lusi et li sires de Montbrai. Si se traist li
rois englès, et toute son host, par devers le cité de
Bervich. Car li rois d'Escoce n'avoit volut respondre 15
aultrement as secons messages qu'il avoit fait as premiers,
si qu'il estoit souffissamment sommés et deffiiés.