«Qant il furent venu jusques à là, il asallirent la ville et le
prisent d'asaut, mais au chastel ne porent il riens faire, _car
il est trop fors et s'est bien gardés tous jours par usage, pour
tant que il fait frontière sus la Giane, et puis chevauchièrent
deviers Aunai et conquissent ville et chastiel et puis Surgières
et Benon_. Et vinrent devant Marant à quatre lieues de la
Rocelle, mais il le trouvèrent si fort que point n'i tournèrent
pour le asallir et passèrent oultre et puis vinrent à Luzegnen et
ardirent la ville, mais au chastiel il ne fourfissent riens et
laissièrent derière euls Pons en Poito et Saintes; mais pour tant
que elles estoient fortes et bien pourveues, il n'i livrèrent
nuls assaus, _et laissièrent Niorth et Chiset et point n'i
asalirent_, et vinrent à Taillebourc sus la Carente.» F{o} 128.