_De trois commerces._
IL ne faut pas se cloüer si fort à ses humeurs et complexions.
Nostre principalle suffisance, c'est, sçauoir s'appliquer à diuers
vsages. C'est estre, mais ce n'est pas viure que se tenir attaché et
obligé par necessité, à vn seul train. Les plus belles ames sont celles
qui ont plus de varieté et de souplesse. Voyla vn honorable tesmoignage
du vieil Caton: _Huic versatile ingenium sic pariter ad omnia
fuit, vt natum ad id vnum diceres, quodcumque ageret._ Si
c'estoit à moy à me dresser à ma mode, il n'est aucune si bonne
façon, où ie voulusse estre fiché, pour ne m'en sçauoir desprendre.
La vie est vn mouuement inegal, irregulier, et multiforme. Ce n'est
pas estre amy de soy, et moins encore maistre; c'est en estre esclaue,
de se suiure incessamment: et estre si pris à ses inclinations,
qu'on n'en puisse fouruoyer, qu'on ne les puisse tordre. Ie le dy à
cette heure, pour ne me pouuoir facilement despestrer de l'importunité
de mon ame, en ce qu'elle ne sçait communément s'amuser,
sinon où elle s'empesche, ny s'employer, que bandee et entiere.
Pour leger subiect qu'on luy donne, elle le grossit volontiers, et
l'estire, iusques au poinct où elle ayt à s'y embesongner de toute sa
force. Son oysiueté m'est à cette cause vne penible occupation, et
qui offense ma santé. La plus part des esprits ont besoing de matiere
estrangere, pour se desgourdir et exercer: le mien en a besoing,
pour se rassoir plustost et seiourner, _vitia otij negotio discutienda
sunt_. Car son plus laborieux et principal estude, c'est,
s'estudier soy. Les liures sont, pour luy, du genre des occupations,
qui le desbauchent de son estude. Aux premieres pensees qui luy
viennent, il s'agite, et fait preuue de sa vigueur à tout sens: exerce
son maniement tantost vers la force, tantost vers l'ordre et la
grace, se range, modere, et fortifie. Il a dequoy esueiller ses facultez
par luy mesme. Nature luy a donné comme à tous, assez de
matiere sienne, pour son vtilité, et des subiects propres assez, où
inuenter et iuger. Le mediter est vn puissant estude et plein, à
qui sçait se taster et employer vigoureusement. I'ayme mieux forger
mon ame, que la meubler. Il n'est point d'occupation ny plus
foible, ny plus forte, que celle d'entretenir ses pensees, selon l'ame
que c'est. Les plus grandes en font leur vacation, _quibus viuere est
cogitare_. Aussi l'a nature fauorisee de ce priuilege, qu'il n'y a rien,
que nous puissions faire si long temps: ny action à laquelle nous
nous addonnions plus ordinairement et facilement. C'est la besongne
des Dieux, dit Aristote, de laquelle naist et leur beatitude et la
nostre. La lecture me sert specialement à esueiller par diuers
obiects mon discours: à embesongner mon iugement, non ma memoyre.
Peu d'entretiens doncq m'arrestent sans vigueur et sans
effort. Il est vray que la gentillesse et la beauté me remplissent et
occupent, autant ou plus, que le pois et la profondeur. Et d'autant
que ie sommeille en toute autre communication, et que ie n'y preste
que l'escorce de mon attention, il m'aduient souuent, en telle sorte
de propos abatus et lasches, propos de contenance, de dire et respondre
des songes et bestises, indignes d'vn enfant, et ridicules:
ou de me tenir obstiné en silence, plus ineptement encore et inciuilement.
I'ay vne façon resueuse, qui me retire à moy: et d'autre
part vne lourde ignorance et puerile, de plusieurs choses communes.
Par ces deux qualitez, i'ay gaigné, qu'on puisse faire au vray,
cinq ou six contes de moy, aussi niais que d'autre quel qu'il soit.
Or suyuant mon propos, cette complexion difficile me rend delicat
à la pratique des hommes: il me les faut trier sur le volet: et
me rend incommode aux actions communes. Nous viuons, et negotions
auec le peuple: si sa conuersation nous importune, si nous
desdaignons à nous appliquer aux ames basses et vulgaires: et les
basses et vulgaires sont souuent aussi reglees que les plus déliees:
et toute sapience est insipide qui ne s'accommode à l'insipience
commune: il ne nous faut plus entremettre ny de nos propres
affaires, ny de ceux d'autruy: et les publiques et les priuez se demeslent
auec ces gens là. Les moins tendues et plus naturelles
alleures de nostre ame, sont les plus belles: les meilleures occupations,
les moins efforcees. Mon Dieu, que la sagesse faict vn bon
office à ceux, de qui elle renge les desirs à leur puissance! Il n'est
point de plus vtile science. Selon qu'on peut: c'estoit le refrain et
le mot fauory de Socrates. Mot de grande substance: il faut adresser
et arrester nos desirs, aux choses les plus aysees et voysines.
Ne m'est-ce pas vne sotte humeur, de disconuenir auec vn milier à
qui ma fortune me ioint, de qui ie ne me puis passer, pour me
tenir à vn ou deux, qui sont hors de mon commerce: ou plustost à
vn desir fantastique, de chose que ie ne puis recouurer? Mes mœurs
molles, ennemies de toute aigreur et aspreté, peuuent aysement
m'auoir deschargé d'enuies et d'inimitiez. D'estre aymé, ie ne dy,
mais de n'estre point hay, iamais homme n'en donna plus d'occasion.
Mais la froideur de ma conuersation, m'a desrobé auec raison,
la bien-vueillance de plusieurs, qui sont excusables de l'interpreter
à autre, et pire sens. Ie suis tres-capable d'acquerir et
maintenir des amitiez rares et exquises. D'autant que ie me harpe
auec si grande faim aux accointances qui reuiennent à mon goust,
ie m'y produis, ie m'y iette si auidement, que ie ne faux pas aysement
de m'y attacher, et de faire impression où ie donne: j'en ay
faict souuent heureuse preuue. Aux amitiez communes, ie suis aucunement
sterile et froid: car mon aller n'est pas naturel, s'il n'est
à pleine voyle. Outre ce, que ma fortune m'ayant duit et affriandé
de ieunesse, à vne amitié seule et parfaicte, m'a à la verité aucunement
desgousté des autres: et trop imprimé en la fantasie, qu'elle
est beste de compagnie, non pas de troupe, comme disoit cet ancien.
Aussi, que i'ay naturellement peine à me communiquer à
demy: et auec modification, et cette seruile prudence et soupçonneuse,
qu'on nous ordonne, en la conuersation de ces amitiez
nombreuses, et imparfaictes. Et nous l'ordonne lon principalement
en ce temps, qu'il ne se peut parler du monde, que dangereusement,
ou faucement. Si voy-ie bien pourtant, que qui a comme
moy, pour sa fin, les commoditez de sa vie, ie dy les commoditez
essentielles, doibt fuyr comme la peste, ces difficultez et delicatesse
d'humeur. Ie louerois vn' ame à diuers estages, qui sçache et se
tendre et se desmonter: qui soit bien par tout où sa fortune la
porte: qui puisse deuiser auec son voisin, de son bastiment, de sa
chasse et de sa querelle: entretenir auec plaisir vn charpentier et
vn iardinier. I'enuie ceux, qui sçauent s'apriuoiser au moindre de
leur suitte, et dresser de l'entretien en leur propre train. Et le conseil
de Platon ne me plaist pas, de parler tousiours d'vn langage
maistral à ses seruiteurs, sans ieu, sans familiarité: soit enuers
les masles, soit enuers les femelles. Car outre ma raison, il est inhumain
et iniuste, de faire tant valoir cette telle quelle prerogatiue
de la fortune: et les polices, où il se souffre moins de disparité
entre les valets et les maistres, me semblent les plus equitables.
Les autres s'estudient à eslancer et guinder leur esprit: moy à le
baisser et coucher: il n'est vicieux qu'en extention.
_Narras et genus Æaci,
Et pugnata sacro bella sub Ilio:
Quo Chium pretio cadum
Mercemur, quis aquam temperet ignibus,
Quo præbente domum, et quota
Pelignis caream frigoribus, taces._
Ainsi comme la vaillance Lacedemonienne auoit besoing de
moderation, et du son doux et gratieux du ieu des flustes, pour la
flatter en la guerre, de peur qu'elle ne se iettast à la temerité, et à
la furie: là où toutes autres nations ordinairement employent des
sons et des voix aigues et fortes, qui esmeuuent et qui eschauffent
à outrance le courage des soldats: il me semble de mesme, contre
la forme ordinaire, qu'en l'vsage de nostre esprit, nous auons pour
la plus part, plus besoing de plomb, que d'ailes: de froideur et de
repos, que d'ardeur et d'agitation. Sur tout, c'est à mon gré bien
faire le sot, que de faire l'entendu, entre ceux qui ne le sont pas:
parler tousjours bandé, _fauellar in punta di forchetta_. Il faut se
desmettre au train de ceux auec qui vous estes, et par fois affecter
l'ignorance. Mettez à part la force et la subtilité: en l'vsage commun,
c'est assez d'y reseruer l'ordre: trainez vous au demeurant à
terre, s'ils veulent. Les sçauans chopent volontiers à cette pierre:
ils font tousiours parade de leur magistere, et sement leurs liures
par tout. Ils en ont en ce temps entonné si fort les cabinets et oreilles
des dames, que si elles n'en ont retenu la substance, au moins
elles en ont la mine. A toute sorte de propos, et matiere, pour
basse et populaire qu'elle soit, elles se seruent d'vne façon de parler
et d'escrire, nouuelle et sçauante.
_Hoc sermone pauent, hoc iram, gaudia, curas,
Hoc cuncta effundunt animi secreta, quid vltrà?
Concumbunt doctè._
Et alleguent Platon et sainct Thomas, aux choses ausquelles le premier
rencontré, seruiroit aussi bien de tesmoing. La doctrine qui
ne leur a peu arriuer en l'ame, leur est demeuree en la langue. Si
les bien-nees me croient, elles se contenteront de faire valoir leurs
propres et naturelles richesses. Elles cachent et couurent leurs
beautez, soubs des beautez estrangeres: c'est grande simplesse,
d'estouffer sa clarté pour luire d'vne lumiere empruntee. Elles sont
enterrees et enseuelies soubs l'art de _Capsula totæ_. C'est qu'elles ne
se cognoissent point assez: le monde n'a rien de plus beau: c'est
à elles d'honnorer les arts, et de farder le fard. Que leur faut-il,
que viure aymees et honnorees? Elles n'ont, et ne sçauent que
trop, pour cela. Il ne faut qu'esueiller vn peu, et reschauffer les
facultez qui sont en elles. Quand ie les voy attachees à la rhetorique,
à la iudiciaire, à la logique, et semblables drogueries, si vaines
et inutiles à leur besoing: i'entre en crainte, que les hommes
qui le leur conseillent, le facent pour auoir loy de les regenter
soubs ce tiltre. Car quelle autre excuse leur trouuerois-ie? Baste,
qu'elles peuuent sans nous, renger la grace de leurs yeux, à la
gayeté, à la seuerité, et à la douceur: assaisonner vn nenny, de
rudesse, de doubte, et de faueur: et qu'elles ne cherchent point
d'interprete aux discours qu'on faict pour leur seruice. Auec cette
science, elles commandent à baguette, et regentent les regents et
l'escole. Si toutesfois il leur fasche de nous ceder en quoy que
ce soit, et veulent par curiosité auoir part aux liures: la poësie est
vn amusement propre à leur besoin: c'est vn art follastre, et subtil,
desguisé, parlier, tout en plaisir, tout en montre, comme elles.
Elles tireront aussi diuerses commoditez de l'histoire. En la philosophie,
de la part qui sert à la vie, elles prendront les discours qui
les dressent à iuger de nos humeurs et conditions, à se deffendre de
nos trahisons: à regler la temerité de leurs propres desirs: à mesnager
leur liberté: allonger les plaisirs de la vie, et à porter humainement
l'inconstance d'vn seruiteur, la rudesse d'vn mary, et
l'importunité des ans, et des rides, et choses semblables. Voyla pour
le plus, la part que ie leur assignerois aux sciences. Il y a des
naturels particuliers, retirez et internes. Ma forme essentielle, est
propre à la communication, et à la production: ie suis tout au
dehors et en euidence, nay à la societé et à l'amitié. La solitude
que i'ayme, et que ie presche, ce n'est principallement, que ramener
à moy mes affections, et mes pensees: restreindre et resserrer,
non mes pas, ains mes desirs et mon soucy, resignant la solicitude
estrangere, et fuyant mortellement la seruitude, et l'obligation: et
non tant la foule des hommes, que la foule des affaires. La solitude
locale, à dire verité, m'estend plustost, et m'eslargit au dehors: ie
me iette aux affaires d'estat, et à l'vniuers, plus volontiers quand
ie suis seul. Au Louure et en la presse, ie me resserre et contraints
en ma peau. La foule me repousse à moy. Et ne m'entretiens iamais
si folement, si licentieusement et particulierement, qu'aux lieux de
respect, et de prudence ceremonieuse. Nos folies ne me font pas rire,
ce sont nos sapiences. De ma complexion, ie ne suis pas ennemy de
l'agitation des cours: i'y ay passé partie de la vie: et suis faict à
me porter allaigrement aux grandes compagnies: pourueu que ce
soit par interualles, et à mon poinct. Mais cette mollesse de iugement,
dequoy ie parle, m'attache par force à la solitude. Voire chez
moy, au milieu d'vne famille peuplee, et maison des plus frequentees,
i'y voy des gens assez, mais rarement ceux, auecq qui i'ayme
à communiquer. Et ie reserue là, et pour moy, et pour les autres,
vne liberté inusitee. Il s'y faict trefue de ceremonie, d'assistance, et
conuoiemens, et telles autres ordonnances penibles de nostre courtoisie
(ô la seruile et importune vsance) chacun s'y gouuerne à sa
mode, y entretient qui veut ses pensees: ie m'y tiens muet, resueur,
et enfermé, sans offence de mes hostes. Les hommes, de la societé
et familiarité desquels ie suis en queste, sont ceux qu'on appelle
honnestes et habiles hommes: l'image de ceux icy me degouste
des autres. C'est à le bien prendre, de nos formes, la plus
rare: et forme qui se doit principallement à la nature. La fin de
ce commerce, c'est simplement la priuauté, frequentation, et conference:
l'exercice des ames, sans autre fruit. En nos propos, tous
subiects me sont égaux: il ne me chaut qu'il y ayt ny poix, ny
profondeur: la grace et la pertinence y sont tousiours: tout y est
teinct d'vn iugement meur et constant, et meslé de bonté, de franchise,
de gayeté et d'amitié. Ce n'est pas au subiect des substitutions
seulement, que nostre esprit montre sa beauté et sa force, et
aux affaires des Roys: il la montre autant aux confabulations
priuees. Ie congnois mes gens au silence mesme, et à leur soubsrire,
et les descouure mieux à l'aduanture à table, qu'au conseil.
Hippomachus disoit bien qu'il congnoissoit les bons lucteurs, à les
voir simplement marcher par vne ruë. S'il plaist à la doctrine de
se mesler à nos deuis, elle n'en sera point refusee: non magistrale,
imperieuse, et importune, comme de coustume, mais suffragante
et docile elle mesme. Nous n'y cherchons qu'à passer le
temps: à l'heure d'estre instruicts et preschez, nous l'irons trouuer
en son throsne. Qu'elle se demette à nous pour ce coup s'il
lui plaist: car toute vtile et desirable qu'elle est, ie presuppose,
qu'encore au besoing nous en pourrions nous bien du tout passer,
et faire nostre effect sans elle. Vne ame bien nee, et exercee à la
practique des hommes, se rend plainement aggreable d'elle mesme.
L'art n'est autre chose que le contrerolle, et le registre des productions
de telles ames. C'est aussi pour moy vn doux commerce,
que celuy des belles et honnestes femmes: _nam nos quoque
oculos eruditos habemus._ Si l'ame n'y a pas tant à iouyr qu'au premier,
les sens corporels qui participent aussi plus à cettuy-cy, le
ramenent à vne proportion voisine de l'autre: quoy que selon moy,
non pas esgalle. Mais c'est vn commerce où il se faut tenir vn peu
sur ses gardes: et notamment ceux en qui le corps peut beaucoup,
comme en moy. Ie m'y eschauday en mon enfance: et y souffris
toutes les rages, que les poëtes disent aduenir à ceux qui s'y laissent
aller sans ordre et sans iugement. Il est vray que ce coup de
fouët m'a seruy depuis d'instruction.
_Quicumque Argolica de classe Capharea fugit,
Semper ab Euboicis vela retorquet aquis._
C'est folie d'y attacher toutes ses pensees, et s'y engager d'vne affection
furieuse et indiscrete. Mais d'autre part, de s'y mesler sans
amour, et sans obligation de volonté, en forme de comediens, pour
iouer vn rolle commun, de l'aage et de la coustume, et n'y mettre
du sien que les parolles: c'est de vray pouruoir à sa seureté: mais
bien laschement, comme celuy qui abandonneroit son honneur ou
son proffit, ou son plaisir, de peur du danger. Car il est certain,
que d'vne telle pratique, ceux qui la dressent, n'en peuuent esperer
aucun fruict, qui touche ou satisface vne belle ame. Il faut auoir en
bon escient desiré, ce qu'on veut prendre en bon escient plaisir de
iouyr. Ie dy quand iniustement fortune fauoriseroit leur masque:
ce qui aduient souuent, à cause de ce qu'il n'y a aucune d'elles, pour
malotrüe qu'elle soit, qui ne pense estre bien aymable, qui ne se
recommande par son aage, ou par son poil, ou par son mouuement
(car de laides vniuersellement, il n'en est non plus que de belles) et
les filles Brachmanes, qui ont faute d'autre recommendation, le
peuple assemblé à cri publiq pour cet effect, vont en la place, faisans
montre de leurs parties matrimoniales: veoir, si par là aumoins
elles ne valent pas d'acquerir vn mary. Par consequent il n'en est
pas vne qui ne se laisse facilement persuader au premier serment
qu'on luy fait de la seruir. Or de cette trahison commune et ordinaire
des hommes d'auiourd'huy, il faut qu'il aduienne, ce que desia
nous montre l'experience: c'est qu'elles se r'allient et reiettent
à elles mesmes, ou entre elles, pour nous fuyr: ou bien qu'elles se
rengent aussi de leur costé, à cet exemple que nous leur donnons:
qu'elles ioüent leur part de la farce, et se prestent à cette negociation,
sans passion, sans soing et sans amour: _Neque affectui suo aut
alieno obnoxiæ._ Estimans, suyuant la persuasion de Lysias en Platon,
qu'elles se peuuent addonner vtilement et commodement à
nous, d'autant plus, que moins nous les aymons. Il en ira comme
des comedies, le peuple y aura autant ou plus de plaisir que les
comediens. De moy, ie ne connois non plus Venus sans Cupidon,
qu'vne maternité sans engeance. Ce sont choses qui s'entreprestent
et s'entredoiuent leur essence. Ainsi cette piperie reiallit sur celuy
qui la fait: il ne luy couste guere, mais il n'acquiert aussi rien qui
vaille. Ceux qui ont faict Venus Deesse, ont regardé que sa principale
beauté estoit incorporelle et spirituelle. Mais celle que ces gens
cy cerchent, n'est pas seulement humaine, ny mesme brutale: les
bestes ne la veulent si lourde et si terrestre. Nous voyons que l'imagination
et le desir les eschauffe souuent et solicite, auant le corps:
nous voyons en l'vn et l'autre sexe, qu'en la presse elles ont du
choix et du triage en leurs affections, et qu'elles ont entre-elles des
accointances de longue bien-vueillance. Celles mesmes à qui la
vieillesse refuse la force corporelle, fremissent encores, hannissent
et tressaillent d'amour. Nous les voyons auant le faict, pleines d'esperance
et d'ardeur: et quand le corps a ioué son ieu, se chatouiller
encor de la douceur de cette souuenance: et en voyons qui
s'enflent de fierté au partir de là, et qui en produisent des chants
de feste et de triomphe, lasses et saoules. Qui n'a qu'à descharger
le corps d'vne necessité naturelle, n'a que faire d'y embesongner
autruy auec des apprests si curieux. Ce n'est pas viande à vne
grosse et lourde faim. Comme celuy qui ne demande point qu'on
me tienne pour meilleur que ie suis, ie diray cecy des erreurs de
ma ieunesse: non seulement pour le danger qu'il y a, de la santé,
(si n'ay-ie sceu si bien faire, que ie n'en aye eu deux atteintes,
legeres toutesfois, et preambulaires) mais encores par mespris, ie
ne me suis guere adonné aux accointances venales et publiques.
I'ay voulu aiguiser ce plaisir par la difficulté, par le desir et par
quelque gloire. Et aymois la façon de l'Empereur Tibere, qui se
prenoit en ses amours, autant par la modestie et noblesse, que par
autre qualité. Et l'humeur de la courtisane Flora, qui ne se prestoit
à moins, que d'vn Dictateur, ou Consul, ou Censeur: et prenoit
son deduit, en la dignité de ses amoureux. Certes les perles et le
brocadel y conferent quelque chose: et les tiltres, et le train. Au
demeurant, ie faisois grand compte de l'esprit, mais pourueu que
le corps n'en fust pas à dire. Car à respondre en conscience, si
l'vne ou l'autre des deux beautez deuoit necessairement y faillir,
i'eusse choisi de quitter plustost la spirituelle. Elle a son vsage en
meilleures choses. Mais au subiect de l'amour, subiect qui principallement
se rapporte à la veuë et à l'atouchement, on faict quelque
chose sans les graces de l'esprit, rien sans les graces corporelles.
C'est le vray aduantage des dames que la beauté: elle est si leur,
que la nostre, quoy qu'elle desire des traicts vn peu autres, n'est
en son point, que confuse auec la leur, puerile et imberbe. On dit
que chez le grand Seigneur, ceux qui le seruent sous titre de beauté,
qui sont en nombre infini, ont leur congé, au plus loing, à vingt et
deux ans. Les discours, la prudence, et les offices d'amitié, se
trouuent mieux chez les hommes: pourtant gouuernent-ils les affaires
du monde. Ces deux commerces sont fortuites, et despendans
d'autruy: l'vn est ennuyeux par sa rareté, l'autre se flestrit
auec l'aage: ainsin ils n'eussent pas assez prouueu au besoing de
ma vie. Celuy des liures, qui est le troisiesme, est bien plus seur et
plus à nous. Il cede aux premiers les autres aduantages: mais il
a pour sa part la constance et facilité de son seruice. Cettuy-cy
costoye tout mon cours, et m'assiste par tout: il me console en la
vieillesse et en la solitude: il me descharge du poix d'vne oisiueté
ennuyeuse: et me deffait à toute heure des compagnies qui me
faschent: il emousse les pointures de la douleur, si elle n'est du
tout extreme et maistresse. Pour me distraire d'vne imagination
importune, il n'est que de recourir aux liures, ils me destournent
facilement à eux, et me la desrobent. Et si ne se mutinent point,
pour voir que ie ne les recherche, qu'au deffaut de ces autres commoditez,
plus reelles, viues et naturelles: ils me reçoiuent tousiours
de mesme visage. Il a bel aller à pied, dit-on, qui meine
son cheual par la bride. Et nostre Iacques Roy de Naples, et de
Sicile, qui beau, ieune, et sain, se faisoit porter par pays en
ciuiere, couché sur vn meschant oriller de plume, vestu d'vne robe
de drap gris, et vn bonnet de mesme: suiuy ce pendant d'vne
grande pompe royalle, lictieres, cheuaux à main de toutes sortes,
gentils-hommes et officiers: representoit vne austerité tendre encores
et chancellante. Le malade n'est pas à plaindre, qui a la guarison
en sa manche. En l'experience et vsage de cette sentence, qui
est tres-veritable, consiste tout le fruict que ie tire des liures. Ie
ne m'en sers en effect, quasi non plus que ceux qui ne les cognoissent
poinct. I'en iouys, comme les auaritieux des tresors, pour sçauoir
que i'en iouyray quand il me plaira: mon ame se rassasie et
contente de ce droict de possession. Ie ne voyage sans liures, ny en
paix, ny en guerre. Toutesfois il se passera plusieurs iours, et des
mois, sans que ie les employe. Ce sera tantost, dis-ie, ou demain,
ou quand il me plaira: le temps court et s'en va ce pendant sans
me blesser. Car il ne se peut dire, combien ie me repose et seiourne
en cette consideration, qu'ils sont à mon costé pour me donner du
plaisir à mon heure: et à reconnoistre, combien ils portent de secours
à ma vie. C'est la meilleure munition que i'aye trouué à cet
humain voyage: et plains extremement les hommes d'entendement,
qui l'ont à dire. I'accepte plustost toute autre sorte d'amusement,
pour leger qu'il soit: d'autant que cettuy-cy ne me peut faillir.
Chez moy, ie me destourne vn peu plus souuent à ma librairie, d'où,
tout d'vne main, ie commande mon mesnage. Ie suis sur l'entree,
et vois soubs moy, mon iardin, ma basse cour, ma cour, et dans la
plus part des membres de ma maison. Là ie feuillette à cette heure
vn liure, à cette heure vn autre, sans ordre et sans dessein, à
pieces descousues. Tantost ie resue, tantost i'enregistre et dicte, en
me promenant, mes songes que voicy. Elle est au troisiesme estage
d'vne tour. Le premier, c'est ma chapelle, le second vne chambre
et sa suitte, où ie me couche souuent, pour estre seul. Au dessus,
elle a vne grande garderobe. C'estoit au temps passé, le lieu plus
inutile de ma maison. Ie passe là et la plus part des iours de ma
vie, et la plus part des heures du iour. Ie n'y suis iamais la nuict.
A sa suitte est vn cabinet assez poly, capable à receuoir du feu
pour l'hyuer, tres-plaisamment percé. Et si ie ne craignoy non plus
le soing que la despense, le soing qui me chasse de toute besongne:
i'y pourroy facilement coudre à chasque costé vne gallerie de
cent pas de long, et douze de large, à plein pied: ayant trouué tous
les murs montez, pour autre vsage, à la hauteur qu'il me faut. Tout
lieu retiré requiert vn proumenoir. Mes pensees dorment, si ie les
assis. Mon esprit ne va pas seul, comme si les iambes l'agitent.
Ceux qui estudient sans liure, en sont tous là. La figure en est
ronde, et n'a de plat, que ce qu'il faut à ma table et à mon siege:
et vient m'offrant en se courbant, d'vne veuë, tous mes liures, rengez
sur des pulpitres à cinq degrez tout à l'enuiron. Elle a trois
veuës de riche et libre prospect, et seize pas de vuide en diametre.
En hyuer i'y suis moins continuellement: car ma maison est iuchee
sur vn tertre, comme dit son nom: et n'a point de piece plus
euentee que cette cy: qui me plaist d'estre vn peu penible et à l'esquart,
tant pour le fruit de l'exercice, que pour reculer de moy la
presse. C'est là mon siege. I'essaye à m'en rendre la domination
pure: et à soustraire ce seul coing, à la communauté et coniugale,
et filiale, et ciuile. Par tout ailleurs ie n'ay qu'vne auctorité verbale:
en essence, confuse. Miserable à mon gré, qui n'a chez soy,
où estre à soy: où se faire particulierement la cour: où se cacher.
L'ambition paye bien ses gents, de les tenir tousiours en montre,
comme la statue d'vn marché. _Magna seruitus est magna fortuna._
Ils n'ont pas seulement leur retraict pour retraitte. Ie n'ay rien iugé
de si rude en l'austerité de vie, que nos religieux affectent, que ce
que ie voy en quelqu'vne de leurs compagnies, auoir pour regle vne
perpetuelle societé de lieu: et assistance nombreuse entre eux, en
quelque action que ce soit. Et trouue aucunement plus supportable,
d'estre tousiours seul, que ne le pouuoir iamais estre. Si quelqu'vn
me dit, que c'est auillir les muses, de s'en seruir seulement
de iouet, et de passetemps, il ne sçait pas comme moy, combien
vaut le plaisir, le ieu et le passetemps: à peine que ie ne die toute
autre fin estre ridicule. Ie vis du iour à la iournee, et parlant en
reuerence, ne vis que pour moy: mes desseins se terminent là.
I'estudiay ieune pour l'ostentation; depuis, vn peu pour m'assagir:
à cette heure pour m'esbattre: iamais pour le quest. Vne humeur
vaine et despensiere que i'auois, apres cette sorte de meuble: non
pour en prouuoir seulement mon besoing, mais de trois pas au
dela, pour m'en tapisser et parer: ie l'ay pieça abandonnee. Les
liures ont beaucoup de qualitez aggreables à ceux qui les sçauent
choisir. Mais aucun bien sans peine. C'est vn plaisir qui n'est pas
net et pur, non plus que les autres: il a ses incommoditez, et bien
poisantes. L'ame s'y exerce, mais le corps, duquel ie n'ay non plus
oublié le soing, demeure ce pendant sans action, s'atterre et s'attriste.
Ie ne sçache excez plus dommageable pour moy, ny plus à
euiter, en cette declinaison d'aage. Voyla mes trois occupations
fauories et particulieres. Ie ne parle point de celles que ie doibs au
monde par obligation ciuile.