Lincoln's Inn MS. Hale 135 (about 1300).
_Nou sprinkes þe sprai,
Al for loue icche am so seek
Þat slepen I ne mai._
Als I me rode þis endre dai
O mi playinge, 5
Seih I hwar a litel mai
Bigan to singge:
'Þe clot him clingge!
Wai es him i louue-longinge
Sal libben ai!' 10
_Nou sprinkes, &c._
Son icche herde þat mirie note,
_Þ_ider I drogh;
I fonde hire in an herber swot
Vnder a bogh,
With ioie inogh. 15
Son I asked: 'Þou mirie mai,
Hwi sinkestou ai?'
_Nou sprinkes, &c._
Þan answerde þat maiden swote
Midde wordes fewe:
'Mi lemman me haues bihot 20
Of louue trewe:
He chaunges anewe.
_Y_iif I mai, it shal him rewe
Bi þis dai.'
_Nou sprinkes, &c._
[Foot-note: 4 Þis endre dai als I me rode _MS.; corr. Skeat_.]
[Foot-note: 5 playinge] _indistinct_.]
[Foot-note: 8 clingge] clingges _MS._]