Cesar augustus fut empereur de romme & de tout le monde/ & pour ce que
au temps de sa seigneurie fut paix par tout le monde que il seigneurioit
paisiblement/ la folle gent mescreant tenoient que celle paix fust pour
cause du bien de luy/ mais non estoit/ car c’estoit pour cause de
Jesuchrist qui estoit né de la vierge Marie & ja estoit sur terre/ &
tant comme il vesquit paix fut par tout le monde/ si vouloyent adorer
cesar comme dieu/ mais adonc sibile Cumana lui dist que bien gardast que
adorer ne se feist/ & qu’il n’estoit fors ung seul dieu qui tout avoit
creé. Et lors le mena sur une haulte montaigne hors de la cité & dedens
le soleil par la voulenté nostreseigneur apparut une vierge tenant ung
enfant. Sibile luy monstra & luy dist que celuy estoit vray dieu qui
devoit estre adoré/ & adonc Cesar le adora. Et pource que cesar augustus
qui prince estoit de tout le monde apprint a congnoistre dieu a la
creance d’une femme peult estre dit a propos l’auctorité que dit Hermes.
Ne te soit point honte d’ouyr verité & bon enseignement qui que le die/
car verité anoblist celluy qui la prononce.