ad perpetuam rei memoriam.
_Prudentium Virginum votis, quæ spreto mortalis viri thoro, ei qui
speciosus est præ filiis hominum desponsari voluerunt, debemus & volumus
favorabiles inveniri. Cùm itaque sicut accepimus, dilectæ filiæ in
Christo Priorissa & Moniales Monasterii Annuntiationis Beatæ Mariæ
Virginis, Ordinis Sancti Augustini Genvensis, certas constitutiones, &
ordinationes regularibus institutis dicti Ordinis conformes, ab ipsis, &
pro tempore existentibus Priorissæ & Monialibus dicti Monasterii
perpetuò observandas unum volumen compilaverint, & constitutiones, ac
ordinationes hujusmodi per Venerabiles Fratres nostros Sanctæ Romanæ
Ecclesiæ Cardinales negotiis, & consultationibus Regularium præpositos
revisæ, examinatæ, & approbatæ fuerint. Cupiantque Priorissa, & Moniales
prædictæ easdem ordinationes regulares, sic revisas, examinatas &
approbatas, ad verbum inferiùs insertas, pro firmiori earum
subsistentia, & inviolabili observatione, Apostolicæ nostræ
confirmationi robore communiri. Ideò nobis humiliter supplicari
fecerunt, ut super præmissis oportunè providere de benignitate
Apostolica dignaremur. Nos igitur Monasterii hujusmodi, illiusque
personarum foelici statui, & successui in præmissis consulere, dictasque
Priorissam, & Moniales specialibus favoribus, & gratiis pro sequi
volentes, & earum singulares personas à quibusvis excommunicationis,
suspensionis, & interdicti, alliisque Ecclesiasticis sententiis,
censuris, & poenis à jure vel ab homine quavis occasione, vel causa
latis, si quibus quomodolibet innodatæ existunt, ad effectum præsentium
duntaxat consequendum harum serie absolventes, & absolutas fore
censentes, hujusmodi supplicationibus inclinati. De eorumdem Cardinalium
consilio Constitutiones, & ordinationes prædictas, omniaque, & singula
in illis contenta Apostolica autoritate tenore præsentium perpetuò
confirmamus, & approbamus, illisque perpetuæ, & inviolabilis Apostolice
firmitatis robur adiicimus, ac omnes, & singulos tam juris quàm facti, &
alios etiam quantumvis substantiales defectus, si qui de super
quomodolibet intervenerint, supplemus: nec non prædictas, & pro tempore
existentes Priorissam, & Moniales dicti Monasterii ab eis nullo unquam
tempore resilire posse, sed ad plenariam illarum observationem teneri &
obligatas esse, & ad id etiam sub censuris Ecclesiasticis, & aliis in
constitutionibus & ordinationibus prædictis contentis, poenis cogi, &
compelli posse, sicque per quoscumque Judices ordinarios, & delegatos
etiam causarum Palatii Apostolici Auditores judicari, & definiri debere,
ac irritum, & inane si secus super his à quoquam quavis autoritate
scienter, vel ignoranter contigerit attentari. Nonobstantibus
constitutionibus, & ordinationibus Apostolicis, ac Monasterii, & Ordinis
prædictarum etiam juramenta, confirmatione Apostolica, vel quavis
firmitate alia roboratis, statutis, & consuetudinibus, privilegiis
quoque, indultis, & litteris Apostolicis eidem Monasterio, & illius
Ordini, illorumque Superioribus, & quibusvis aliis personis sub
quibuscumque tenoribus, & formis, ac cum quibusvis clausulis, & decretis
in contrarium præmissorum quomodolibet concessis, confirmatis, &
innovatis. Quibus omnibus, & singulis eorum, omnium tenores præsentibus
pro expressis, & ad verbum insertis habentes, illis alias in suo robore
permansuris, hac vice duntaxat specialiter, & expressè derogamus,
cæterisque contrariis quibuscumque._
_Tenor autem constitutionum, & ordinationum prædictarum est qui
sequitur; Videlicet._