_To the worshipfull John Paston, and to my cosyn, Wylliam Rokewode,
Squyer, with my Lord of Cantyrburi._
[Sidenote: 1461 / JULY 16]
Right worshipfull sir, I recummaund me to yow, praying yow hertyli to
labour for that the Kyng may wryte unto me, gevyng me thankyng of the
good wyll and servyse that I haff doo unto hym, and in beyng with hym a
yens his adversaries and rebelyones, as well in the North, as in this
cuntre of Norffolk. And in that the Kyng shold please the Comynnes in
this cuntre; for they grudge and sey, how that the Kyng resayvith sych
of this cuntre, &c. as haff be his gret eanemyes, and opresseors of the
Comynes; and sych as haff assystyd his Hynes, be not rewardyt; and it is
to be consederyd, or ellys it wyll hurt, as me semyth by reason. And in
ayd of this chaungebyll rewle, it wer nessessary to move the good Lords
Spiretuall and Temperall, by the whech that myght be reformyd, &c. And
in cas that any of myn olde enemyes, Tudynham, Stapylton, and Heydon,
with theyr affenyte labur the Kyng and Lords unto my hurt, I am and
wylbe redy to come to my souverayn Lord for my exskeus, soo that I may
come saff for unlawfull hurt, purveyed by my seyd ennemyes. No more at
this tyme, but God preserve yow in gras. Wretyn at Wychyngham the xvj.
day in the moneth of July, anno regni Regis E. iiij^ti. primo.