_To my ryth worchepfull hosbond, John Paston, be thys deliverid in
hast._
[Sidenote: 1461 / JULY 9]
Right worchepful hosbond, I recommand me to yow. Please yow to wete that
I have spoke with Thomas Denys wyffe, and she recommand hyr to your good
masterchep, and she prayeth yow to be her good master, and prayet yow of
your good masterchep, that ye wolle geve her your advice howe to be
demenid for hyr person and hyr goodes. For as towchyng hyr owne person,
she dare not goo home to hyr owne place, for she is thret if that she
myght be take, she shuld be slayne or be put in ferfull place, in
shortyng of hyr lyve dayes, and so she standyth in gret hevynes, God her
helpe. Ferther more she is nowe put be her brother in Norwich with
Awbry, and she thynkyth the place is right conversaunt of pupyll for hyr
to abeyd in, for she kepyth hyr as close as she may for spyyng. Item, as
I went to Seynt Levenard ward, I spake with Maister John Salet, and
commonyd with hym of hyr, and me thowgt be hym that he howyth hyr ryght
good wylle. And than I haskyd hym howe she myght be demenyd with
hys[287.2] goodes and hyr. He cownseld me that she shuld get hyr a
trosty frend, that war a good, trewe, poor man, that had not moche to
lese, and wold be rewlyd after hyr, and to have a letter of
ministracion; and so I told hyr. Than she seyd she wold have hyr broder
advice therin. Item, she seyth ther be no mor feffes in hys londes but
ye and Rokwood, and she prayeth yow that it please yow to speke to
Rokwood that he make no relesse but be your advice, as she trostyth to
yowr good masterchep. Item, the last tyme that I spake with hyr she mad
suche a petows mone and seyd that she wost ner howe to do for mony, and
so I lent vj_s._ viij_d._ Item, I sent my cosyn Barney the bylle that
John Pampyng wrot be yowr commanddement to me, and he hath sent a letter
of hys entent to yow and to Rokwod therof, and also but if it please yow
to take better hed to hys mater than he can do hym self, I can thynk he
shall ellis fare the wors for i’ feyth he standyth daly in gret fere,
for the false contrary party ageyns hym. Item, at the reverence of God,
be ware howe ye ryd or go, for nowgty and evyll desposyd felacheps. I am
put en fere dayly for myn abydyng here, and cownsellyd be my moder and
be other good frendes, that I shuld not abeyd here but yf the world wher
in mor quiete than it is. God for hys merci send us a good world, and
send yow helthe in body and sowle, and good speed in all your maters.
Wreten in hast the Thursday next after Seynt Thomas.
By your,