_To my right trusty and right welbeloved John Paston._
Right trusty and right welbeloved, I grete you wele. And I am enfourmed
that William Mathew of Norwich, Bocher, hath brought an accion of dette
agayn Nicholas Hert, a tenaunt of myn, berer hereof, and hath supposid
by his accyon that my said tenaunt shuld ow hym lxx_s._ for his hire of
tyme that he shuld a ben servaunt to my said tenaunt; wher it is said to
me for trouthe that he was aprentyce to my said tenaunt, and never
othrwise with holde but as aprentice, and owith no mony to haf of hym.
I send to yow my said tenaunt to gif yow clere informacyon of the mater,
and I pray you that ye wole calle the jurry before yow that arn
impanellid betwen thaym, and opne thaym the mater at large at myn
instaunce, and desire thaym to do as concyens wole, and to eschue
perjury. And the Trinite kepe yow. If ye take the mater in rule, I pray
therof, and wole be content.
Wretyn at Wevenho, the xxviij. day of Decembr.