_To my ryth worcepful husbonde, John Paston._
[Sidenote: Year uncertain]
Ryth reverent and worcepfful husbonde, I recomande me to yow, desyryng
hertely to here of yowre welle fare, thankyn yow for yowr letter and for
the thyngys that ye sent me ther with. And towchyn John Estegate, he com
nowdyr non sent hedyr nowt zyt; wer for I sopose I must borrowyn money
in schorte time but zyf [_unless_] ye come sone home; for I sopose I xal
non have of hym, so Godd helpe me. I have but iiij_s._ and I howhe nerr
as meche mony as com to the for seyd some. I have do yowr herrendys to
my modyr and my hunckyl and as for the feffeys of Stokysby, my hunckyll
syth that ther be no mo than he wrot to yow of that he knowit. And also
I hauwe delyvyrit the todyr thyng that ye sent me inselyd in the boxe as
ye comaundit me, and the man seyt, that I delyverid it to, that he wylle
nowt of the bargeyne that ye sent hym, but sweche thynggys be do or he
come ther that ye sent hym worde of, he seyth that he wold nowt be
noysyd with no sweche thyngis of that is, that it wer do in hesse tyme
for xx. marke. I sopose he xal send yow word in shorte time ho he wylle
do. I pray yow that ye wylle weche save to beyn for me swech lacys os I
send yow exsaumpyll of in this letter and j. pesse of blac lacys; as for
cappys that ye sent me for the chylderyn they be to lytyl for hem.
I pray yow bey hem feyner cappys and larger than tho wer. Also I pray
yow that ye wylle weche save to recomaunde me to my fadyr and my modyr
and tellyth heer that alle herr chyldyrryn ben in gode hele, blyssyd be
Godd. Heydonis wyffe had chyld on Sent Petyr day. I horde seyne that
herr husband wille nowt of her, nerr of her chyld that sche had last
nowdyr. I herd seyn that he seyd, zyf sche come in hesse precence to
make her exkewce that he xuld kyt of her nose to makyn her be know wat
sche is; and yf her chyld come in hesse presence, he seyd he wyld kyllyn
he wolle nowt be intretit to have her ayun in no wysse, os I herde seyn.
The Holy Trinite have yow in Hesse kepyn and send yow helth. Wretyn at
Geldiston on the Wedynisday nexte after Sent Thomas.
Be yowris,