_On to my Maystyr Pastone, be this lettre deliveryd._
Ryth wurchopful Sere, I recomaund me on to you. And iff it lyke you I
have spokyn with Bussard, and demaundyd hym iff he had ony evydens,
dedys, or copyis, or ony other evydens of ony place or off ony lyflod
that longget on to my mayster,[253.2] and seyth, Nay, be is feyth, and
be is trowthe, for, if he hadde, he wold send hem on to you with a good
wyl; for he seyth it xud don hym non ese. And, Ser, iff it plese you I
askyd hym if he knew ony evydens that he had delyveryd on to William
Wossetyr, bill, or deds, or ony other evydens that xuld longgyn on to
ony purchas or off ony lyfflod on to my maystrys, and he seyth, Nay
trewly; for he seyth the last tyme that he wrot on to William Wusseter,
it was be ffor myssomyr, and thanne he wrot a cronekyl of Jerewsalem,
and the jornes that my mayster dede whyl he was in Fraunce (that God on
his sowle have mercy!); and he seyth that this drow more than xx.
whazerys [20 _quires ?_] off paper, and the wrytyng delyveryd on to
William Wursseter, and non other, ne knowyth not off non other be is
feyth.
Be your man,