_To the right worshipfull Sir and Maister, John Paston, Escuier, at
Norwiche, be this delyvered in hast._
[Sidenote: 1460 / OCT. 12]
Right worschipfull Sir and Maister, I recomaund me un to you. Please you
to wete, the Monday after oure Lady Day[233.2] there come hider to my
maister ys place,[233.3] my Maister Bowser, Sir Harry Ratford, John
Clay, and the Harbyger of my Lord of Marche, desyryng that my Lady of
York[233.4] myght lye here untylle the comyng of my Lord of York and hir
tw sonnys, my Lorde George[233.5] and my Lorde Richard,[233.6] and my
Lady Margarete[233.7] hir dawztyr, whiche y graunt hem in youre name to
ly here untylle Mychelmas. And she had not ley here ij. dayes but sche
had tythyng of the londyng of my Lord at Chestre. The Tewesday next
after, my Lord sent for hir that sche shuld come to hym to Harford
[_Hereford_], and theder sche is gone. And sythe[233.8] y left here
bothe the sunys and the dowztyr, and the Lord of Marche comyth every day
to se them.
Item, my Lord of York hath dyvers straunge commissions fro the Kyng for
to sitte in dyvers townys comyng homward; that is for to sey, in Ludlow,
Schrrofysbury, Herford, Leycetre, Coventre, and in other dyvers townys,
to punych them by the fawtes to the Kyngs lawys.
As for tythyngs here, the Kyng is way at Eltham and at Grenewych to hunt
and to sport hym there, bydyng the Parlement, and the Quene and the
Prynce byth in Walys alway. And is with hir the Duc of Excestre and
other, with a fewe mayne, as men seythe here.
And the Duc of Somerset he is in Depe [_Dieppe_]; withe hym Maister John
Ormound, Wyttyngham, Andrew Trollyp, and other dyvers of the garyson of
Gyanys, under the Kyng of Fraunce safcondyte, and they seythe here, he
porpose hym to go to Walys to the Quene. And the Erle of
Wyltschyre[234.1] is stylle in pece at Otryght at the Frerys [_Friars_],
whiche is seyntwary.
Item, Colbyne ys come home to my maister is place, and seyth that, at
your departyng[234.2] ouzt of London, ze send hym word that he schuld
come hedder to the place, and be here un tylle your comyng a zene; and
so he is here it, and seith he wolle take no maister but be your avyce,
nether the leese [_nevertheless_] awaytythe uppon Maister Oldhall the
most parte at Redre[234.3] at his place.
Item, Maister Ponyngs hathe enteret on an two or iij. placys uppon the
Erle of Northomberlond, and he stondyth in good grace of the Kyng, my
Lord of Marche, my Lord Warwyk, and my Lord of Salysbury. Most parte of
the contre abought his lyflod hold aythe withe hym. And my maisteras
your sister[234.4] is not delyverd as yet; God yef hir god delyveraunce.
No more to you at this tyme, but and ze wolle comaund me any servyce y
may doo, it is redy. And Jesu have you in his blessid kepyng; and I
beseche you this letter may comaund me to my maisteras your moder, and
my maisteras your wyfe, and alle your houshold.
Wreten at London the xij. day of Octobre.
Your owne Servaunt,