_To my wurschipfull coysyn, Margaret Paston, be this delyvered in
haste._
[Sidenote: 1460 / JULY 28]
I recomaunde me unto you, letyng you witte that your unkyll, John
Berney, is deed, whoos soule God have mercy; desyryng you to sende for
Thomas Holler,[223.2] and enquere of hym wher his goode is, and what he
is wurthe, and that he take goode eede to all suche goods as he had
bothe meveable and on mevable; for I undre stande that he is wurthe in
money v^c. [500] marke, and in plate to the valwe of other v^c. marke,
beside other goods. Wherfor I wolde ye schulde not lete hym wete of his
dissese unto the tyme that ye had enquered of the seide Thomas Holler of
all suche maters as be a bovyn wreten, and whan he hathe enformed you
therof, than lete hym wete verely that he is deede, desiryng hym that no
man come on to his place at Redham but hym selfe, unto the tyme that I
come.
Item, I lete you witte that gret parte of his goode is at William
Taverners, as I undrestande. Thomas Holler woll telle you justely the
trouthe as I suppose, and deseyre hym on my behalfe that he doo soo, and
ther is writyng therof; and telle Thomas Holler that I and he be
executours named, and therfore lete hym take heede that the goods be
kept saffe, and that nobody knowe wher it shall lie but ye and Thomas
Holler. And Thomas Holler, as your unkyll tolde me, is prevy wher all
his goode lithe and all his writyng, and so I wol that ye be prevy to
the same for casualte of deethe, and ye too shal be his executours for
me as longe as ye doo trewly, as I trowe verely ye woll.
Wreten at London, the xxviij^t. day of Jule.
I requer yow be of god cumfort and be not hevy, if ye wil do owth for
me.
Yowr,