_To my trusty cosyn, Margaret Paston, at Norwich, be this
delyvered._[219.3]
[Sidenote: 1460 / JUNE 19]
I recomaunde me to you, letyng you witte that I sent a letter to John
Russe and Richard Kalle that thei, by th’advyse of Watkyn Shipdam and
William Barker shuld send me word of whom alle the maneres, londes, and
tenementes that were Sir John Fastolffes wern holde, preyng you that ye
wold do them spede them in that matier; and if my feodaryes, whiche lye
in the tye of my gret cofyr, may ought wisse therin, lete them se it.
Item, I wolde that William Barker shulde send me a copye of the olde
traverse of Tychewell and Beyton. And lete Richard Kalle spede hym
hidderward, and come by Snaylwel, and take suyche mony as may be getyn
there, and that he suffre not the mony that the tenauntes owe to come in
the fermours handes.
Item, that he come by Cambrigge and bryng with hym Maister Brakkeles
licence from the provynciall of the Grey Freres. I prey you recomaunde
me to my modir.
Wretyn at London the Thursday next to fore Middesomer.