_To hys rythe wurchyp[full] broder, Jon Paston, [dwell]yng at Castre._
[Sidenote: 1460 / MAY 2]
Broder, I comand me to zow, certhefieng zow that Playter is redyn to
Lundon ward this day abowthe ij. afternone. And he taryed here, and
schulde abedyn styll till he had had an horse that Master Thomas Howys
schuld have lent hym. And so I thowthe he schuld have taried to long;
and so he hathe bowthe on off myn hors. And iff it nede, he schall send
zow word be his man fro Lundon how he felythe the disposycyon off men
ther, &c.; and he schall send his man hom be Newmarket wey. And I have
infurmyd hym acording after the ententhe of zowr letter.
I spak this day with Bokkyng. He had but few wurdes, but I felt be hym
he was rythe evyll disposyd to the parson and zow, but coverthe langgage
he had. I wene he be assentid to the fyndyng of this offyce[217.1] takyn
at Bokynham, and Recheman schall bryng zow the namys of the men that mad
the verdythe on Soneday nexst comyng. I pray send to myn broder Clements
fermor of Somerton for money for my broder Clement, for to have sent to
hym to Lundon. I schuld have done it qwan I was at Caster; myn moder
desyryd me, and I sent a letter after to the parson, and prayed hym to
receve it, &c.
Item, I prayd the parson to wrythe a letter in his name to myn suster
Ponyngges,[217.2] as ze and I comunyd onys togeder, cownsellyng her to
take good avyse befor sche sold her wood at Wrenham; and he schuld knowe
ther by weder Ponyngges wer in Kent ar nat, &c. I understond that this
Bokkyng and Worceter have grett trust in ther awne lewd consaythe, wathe
some ever it menythe, &c. Bokkyng told me this day that he stood as well
in consaythe with myn Maister Fastolff iii. days befor he dyed as any
man in Englond. I sayd I soposyd nay, ner iij. zere before he dyed.
I told hym that I had hard dyveres talkynges of hym as men sayd, qweche
I soposyd schuld nat easly be browthe a bowthe, and he swore that he
talkyd never with no man in no mater that schuld be a zen zow, &c. It is
he that makythe William Wurceter so froward as he is.
I wold ze had a witnesse of Roberd Ingglows, thow he wittnessyd no more
but that myn master had his witthe, becawse he was so lathe with myn
master Fastolff. Worceter sayd at Castre it schuld be nessessary for zow
to have good witnesse, as he saythe it schuld go streythe with zow
wytheowt zowr witnesse were rythe sofycyent. Myn cosyn Berney can tell
zow, &c.
Item, remenbre to make the parson to make an instrument up on his
sayyng. I funde hym rythe good qwan I spak with hym at Caster; and
remembre the newe evydens.
Item, Arblaster and I spakk togeder. I felle hym rythe feythefully
disposyd to zow ward, and he schall mow do myche good and he go to
Lundon, for he can labore will a monge Lordes. He and I comunyd to geder
of myn Lord Awbre;[218.1] lethe hym tell zow qwat it was, for he will
speke with zow to morow. It is full nessessary to mak zow strong be lord
chep, and be oder menys. Myn Lord Awbry hathe weddit the Duke of
Bokyngham dowter,[218.2] and he was lathe with Master Fastolff be fore
he dyed, and he is gret with the Qwene.
God have zow in His kepeng. Wretyn at Norwyche the secund day of May.
Be zowr broder,