_To his right worshipfull brother, John Paston, be this lettre
delyvered._
[Sidenote: 1460 / JAN. 28]
After dewe recomendacion had, please you to wete that we cam to London
uppon the Tewysday by none, nexst aftr our departour fro Norwich, and
sent our men to inquyre after my Lord Chaunceler,[204.2] and Maister
John Stokys, and Malmesbury.
And as for my Lord Chaunceler, he was departed fro London, and was redyn
to the Kyng ij. dayes er we were come to London; and as we understand he
hasted hym to the Kyng by cause of my Lord Ryvers[204.3] takyng at
Sandwyche, &c.[204.4] . . . . . . . .
As for tydyngs, my Lord Ryvers was brougth to Caleys, and by for the
Lords with viij^xx. [_eight score_] torches, and there my Lord of
Salesbury reheted [_rated_] hym, callyng hym knaves son, that he schuld
be so rude to calle hym and these other Lords traytors, for they schall
be found the Kyngs treue liege men, whan he schuld be found a traytour,
&c. And my Lord of Warrewyk rehetyd hym, and seyd that his fader was but
a squyer, and broute up with Kyng Herry the V^te, and sethen hymself
made by maryage, and also made Lord, and that it was not his parte to
have swyche langage of Lords, beyng of the Kyngs blood. And my Lord of
Marche reheted hym in lyke wyse. And Sir Antony[204.5] was reheted for
his langage of all iij. Lords in lyke wyse.
Item, the Kyng cometh to London ward, and, as it is seyd, rereth the
pepyll as he come; but it is certayn ther be comyssyons made in to
dyvers schyres that every man be redy in his best aray to com whan the
Kyng send for hem.
Item, my Lord Roos is com fro Gynes.
No more, but we pray to Jesu have you in his most mercyfull kepyng.
Amen.