And as to money, I delyvered unto the Under-tresorier[198.5] a lettre
from Maister Filongley, and I fonde hym right wele disposid to doo that
may please yow in all our materes; and take noo money of hym as yette,
for we have noo nede to spend ony sumes as yette, ner with Gods grace
shall not have. I come to this town of Coventre suche day sevenyght as
the parlement byganne; and as for suche things as I coude herken aftyr,
I sende to William Worcetre a grete bille of tidings to shewe yow and
all.
Yesterday in the mornyng come inne th’erle of Pembroke[198.6] with a
good felechip; and the Duchesse of York[198.7] come yestereven late, as
the bringer here of shall more pleinly declare yow, to whom ye like to
gif credence. The Bushop of Excester[198.8] and the Lord Grey
Ruthyn[198.9] have declarid them ful worshipfuly to the Kings grete
plesir. Playter and I writen you a lettre by Norffolk, yoman for the
Kyngs mouth.