_To myn ryght worshypfull [m]ayster, John Paston, at London, atte the
Temple._
[Sidenote: 1459 / JUNE 24]
Please youre maystership that as to morwen a newe _inquirendum_ shal be
taken at Wycham Markette for the parsonage of Rendelesham for one
Mayster John Clerke, a chapeleyn of the Lady Roos; and Sir Thomas[141.2]
shuld a ben there, but he is hurte of an hors, and also hit was so late
warnyng that we myght not ben there; and, as Mayster Steven seyth, hit
should not a avayled, thow one hadde bene there, and elles I wold a
labored theder myn self. But he seyth and [_i.e._ if] ye wold speke to
myn Lord Norwych, and enforme hym of the trought of the mater, he shal
never presente ner inducte non tyl the ryght of the patentes be
discussed, and also we may after wardes hald a _melius inquirendum_.
Mayster Steven hath wreten to Sir John Bulman all the tytles and
presentacions, and therefore, if hit please yow to comon with hym, ye
shall understande all the mater by hym how myn Lord is disposed. And
[_if_] Mayster Robert Eppeswell is now at London, hit were shame that
they shuld have ther entent. Sir Phillip Wentworth groundeth not his
presentacion by the patent, but by the endenture a twyxt the wedewe and
hym, &c. Myn mayster is as freshe as ever he was this ij. yere, thanked
be God. And youre mater that ye have meved of to Sir Thomas for the
porchase, &c., myn mayster is weel agreed therto, but fyrst hit was
taken strangely, &c. Almyghty Jesu preserve yow, myn worshipfull
mayster, to youre desyre after his pleser and youre trewe entent.
Hastly at Norwyche, on Seynt John Day, at vij. of the clokke at even.
Youre owen man,