_A mon treshonnoure Seigneur, Jehan Paston, Escuier._
[Sidenote: 1459(?) / MAY 25]
Treshonnoure Sire, je me recommande a vous tant que je puis, et vous
prie qu’il vous plaise me recommander a ma maistresse vostre noble
espouse et a tous voz enffans, et que ne soit point mis en oubly mon
petit homme d’armes. Et oultre vous plaise me recommander a mon Maistre
Yelverton et mon Maistre Caulthorpe, et a touz mes autres maistres et
amis de pardela ou sera vostre bon plaisir. Et vous mercie des grans
plaisirs et amitiez que avez faitz et monstrez a moy et aux miens,
lesquelz Dieu me doint deservir. Treshonnoures Sire, plaise vous savoir
que mon frere Jehan a Bernay ma escript dune matere dont me touchastes,
moy estant parde la, a laquelle vostre desir vouldroit l’onneur des deux
pars, et de laquelle matere le porteur de cestes vous informera, et des
nouvelles de pardeca s’il vient a voz bons plaisirs. Et vouldroye bien
que vous et mon dit frere Jehan a Bernay voulsissez communiquer avecques
la personne aqui la matere touche, et que je peusse savoir son entente,
affin dy otemperer, car je luy vouldroye faire plaisir et service; car
je y suis tenu, et la chose sera en partie reglee par vous et par mondit
frere, mais je veil estre le tiers, et une autre personne sera le quart.
Treschere et treshonnoure Sire, je vous recommande tout mon fait de
pardela, et sy faiz je la petite Marie, pour laquelle je vous mercie, et
especiallement ma damoiselle vostre fame et noble espouse, et me
desplaist de la grant paine et charge que avez pour elle; mas Dieu me
doint grace que je le puisse aquicter. Priant nostre Seigneur qui soit
garde de vous, et vous doint bonne vie et longue, et joyeulx
acomplissement de touz voz desirs.
Escript a Calais, le xxv^me jour de May.
Le tout votre serviteur,