_Tho my ryth worschopfful hossebond, John Paston, in hast._
[Sidenote: 1459 / APRIL 29]
Rythe worchepfwl hosbond, I recommawnd me onto yow. Plesyth you to wete
that on Thorisday last was ther wer browt unto this towne many Prevy
Selis, and on of hem was indosyd to yow, and to Hastynggs, and to fyve
or sexe odyr gentylmen; and anodyr was sent onto yowr sone, and indosyd
to hym selfe alone, and asynyd wythinne wyth the Kynggys howyn hand, and
so wer bwt fewe that wer sent, as it was told me; and also ther wer mor
specyal termys in hys then wern in oderys. I sey a copy of thoo that wer
sent onto odyr gentylmen. The intent of the wrytyng was, that they
sshuwlde be wyth the Kyngg at Leycester the x. day of May, wyth as many
personys defensebylly arayid as they myte acordyng to her degre, and
that they schwld bryng wyth hem for her expensys for ij. monythis. As
for the lettyr that was indosyd to yow and to odyr, it was delyveryd to
Welyam Yelvyrton, for ther aperyd no mor of the remwlawnt. Hastynggs is
forthe into Yorke schyr.
I prey yow that ye vowchesaf to send word in hast how ye wyl that yor
sone be demenyd herin. Men thynk her, that ben yowr wel wyllerys, that
ye may no lesse do than to send hym forthe. As for hys demenyng, swn ye
departyd, in god feythe, it hath ben ryth good, and lowly, and delygent
inn ovyr sythe of yowre servawntys, and odyr thinggys, the whiche I hope
ye wold abe plesyd wyth, and ye had be at hom. I hope he wyl be well
demenyd to plese yow heraftyrward. He desyryd Alblaster to bemene[139.1]
to yow for hym, and was ryte hevy of hys demenyng to yow, as I sent yow
word also be Alblaster, how I dede to hym aftyr that ye wer go; and I
beseche yow hartyly that ye wochesaf to be hys god fadyr, for I hope he
is schastysyd, and wil be the worher [_worthier ?_] heraftyr.
As for alle odyr tynggys at hom, I hope that I and odyr schal do howr
part ther inne, as wel as we may, bwt as for mony it comyth bwt slowly.
And God have yow in hys kepyng, and sen yow good sped in alle yowr
matteris.
Wretyn in hast at Norwece, on the Sonday next before the Assencyon Day.
Ser, I wold be ryte glad to he [_hear_] swmme gode tydynggys fro yow.
Be yorys,