_To my ryght wyrschypful fadre, John Paston, Esquyer, be thys letter
delyveryd in hasty wyse._
[Sidenote: 1459 / MARCH 5]
Ryght worschypful Syr, in the most lowly wyse, I comaund me to yowr good
faderhod, besechyng yow of yowre blyssyng. Mut it plese yowr faderhod to
remembre and concydre the peyn and hevynesse that it hath ben to me syn
yowr departyng owt of thys contre, here abydyng tyl the tyme it please
yow to schewe me grace, and tyl the tyme that by reporte my demenyng be
to yowr plesyng; besechyng yow to concydre that I may not, ner have noo
mene to seke to yow as I awght to do, and savyng under thys forme, whych
I besech yow be not take to no dysplesur, ner am not of power to do any
thynge in thys contre for worschyp or profyht of yow, ner ease of yowr
tenantys whych myght and scholde be to yowr pleasyng. Wherfor I besech
yow of yowr faderly pyte to tendre the more thys symple wryghtyng, as I
schal owt of dowght her after doo that schal please yow to the uttermest
of my power and labor; and if ther be any servyce that I may do if it
please yow to comaund me, or if y maye understonde it, I wyl be as glad
to do it as any thyng erthely, if it wer any thyng that myght be to yowr
pleasyng. And no mor, but Allmyghty God have yow in kepyng.
Wretyn the v. day of Marche.
By your older sone,