_To my right worshypfull moder, Agnes Paston._
[Sidenote: 1459 / JAN. 3]
Right worshipfull and my most entierly belovde moder, in the most louly
maner I recomaund me unto youre gode moderhode, besekeyng you dayly and
nyghtly of your moderly blissing, evermore desiryng to her of your
welfare and prosperite, the which I pray God to contynw and encresce to
your herts desyre. And yf it lyked your gode moderhode to here of me and
how I do, at the makyng of this lettre I was in gode hele of body tanked
be Jesu. And as for my mayster, my best beloved that ye call, and I must
nedes call hym so now, for I fynde noon other cause, and as I trust to
Jesu non shall; for he is full kynde unto me, and is as besy as he can
to make me sur of my joyntor, wherto he is ibounde in a bonde of
m^{l}_li._ to you mother, and to my brother John, and to my brother
William, and to Edmund Clere,[136.1] the which neded no such bond.
Wherfore I beseke you, gode moder, as our most synguler trost is yn your
gode moderhode, that my maistr, my best beloved, fayle not of the C.
marc at the begynnyng of this terme, the which ye promysed hym to his
mariage, with the remanent of the money of faders wille; for I have
promytted faithfully to a gentilman, called Bain, that was oon of my
best beloved suertees, and was bounde for hym in CC_li._, of which he
reherseth for to ryseyve at the begynnyng of thys terme Cxx_li._, and yf
he fayle therof at this tyme, he wille clayme the hool of us, the which
were to us to grete an hurt; and he con not make an ende with noon of
hys other suertees withoute this seyd sylver, and that con my brother
John telle yow wel i nough, and it lusteth hym to do soo, and in all
other thyngs. As to my Lady Pool,[136.2] with whom I sojerned, that ye
wul be my tendr and gode moder that she may be payde for all the costes
doon to me before my maryage, and to Christofre Houson, as ye wrote unto
my brother John that I shuld have ben so; and that it plese your gode
moderhode to yeve credence to William Worcestr. And Jesu for his grete
mercy save yow.
Written at London, the Wendysday the iij. day of Janyver.
By your humble doughter,