_To my ryght worshypful master, Sir John Fastolf._
[Sidenote: 1458 / FEB. 1]
Ryght worshypfull Sir, and my ryght gode maister, I recomaund me to yow
yn my full humble wyse. Please yow to wete, as to nouveltees here
both[125.2] Christofr Barker wryteth to you more along.
The Kyng came the last weke to Westminster, and the Duk of Yorke came to
London with hys oune housole onlye to the nombre of cxl. hors, as it ys
seyd; the Erle of Salysburye with iiij^c. [400] hors yn hys companye,
iiij^xx [_fourscore_] knyghts and sqwyers.
The Duke of Somerset came to London last day of Janyver with ij^c. [200]
hors, and loggyth wythoute Temple Barre, and the Duc of Excestr shalle
be here thys weke with a grete felyshyp and strong, as it ys seyd.
The Erle of Warwyke ys not yhyt com, because the wynde ys not for hym.
And the Duke of Excester takyth a grete displesir that my Lord Warewyke
occupyeth hys office, and takyth the charge of the kepyng of the see
uppon hym.
Item, as for tydyng of beyend see, I hyre none certeyn, but that the
Frensh Kyng[125.3] shulde hafe maryed hys doughter to the Kyng of
Hungerye,[125.4] whych had the descomfytur uppon the Turks, and the seyd
Kyng ys decesed wythynne thys vj. wekes, or the spouselle was made; but
he ordeyned or he dyed that the Frensh Kyngs doughter shuld be named
Quene of Hungerye duryng hyr lyffe.
Rygt worshypfull Sir, I beseche the blessed Trinite hafe yow yn hys
gouvernaunce.
Wrete at London, the fyrst day of Feverzer, anno 36 R. H. VI.
* * *
Moreover, please you to wete that William Canyngs the merchaunt wryteth
an aunsuer of your lettre. I trust it shall be the better for your
wrytyng.
My brother promytted me a certeyn somme when I maryed, and I shall hafe
it of my sister yff I may.
Your humble servauntte,
W. BOTONER, _dit_ WORCESTYR.
[Footnote 125.1: [From Fenn, i. 150.] Fenn states that he has
omitted, as of no consequence, the first part of this letter
relating to the holding of some courts and some other law
matters wherein Yelverton, Fylongley, and others were
concerned.]
[Footnote 125.2: The modern version in Fenn reads ‘here being.’]
[Footnote 125.3: Charles VII.]
[Footnote 125.4: Ladislaus V., who died on the 23rd November
1457, when on the point of marriage with Magdalen, daughter of
Charles VII. of France. He is believed to have been poisoned.]
365