_To the right worchipful and with al myn hert rigt entierly welebiloved
Brother, the Viscount Beaumont._
[Sidenote: 1458(?) / JAN. 24]
Right worshipful, and, with al myn hert, right entierly wele bilovede
brothre, I recomaunde me unto yow. And for somoche as by the Kings moste
noblez lettrez brought me late by Hagreston, oon of the gromes of his
chambre, I am desirede to come unto his Highnesse to London; wherunto
for suche grevous diseas and infirmitees as it hath liked oure Lord to
visit me with, wherof Robert Danby can at large declare unto yow, I can
ne mowe dispose me, without feynyng, by the trouth I owe unto the King,
but that therby I doubt not, I shulde not rekever, daies of my lyfe,
suche hurt as, by the reason of the said diseas, wolde grow unto me, the
which hath right fervently and sore holden me in many diversez bihalvez,
so that, sith my last comyng frome London I had not, by the space of vj.
daies togidiez, my helth.
Wherfore, brothre, I pray yow, with al myn hool hert, that it like yow
to cal tofore yow the said Robert Danby, and to take of him the vray
trouth in the premissez, and therupon to bee my good and tendre moyen,
as by your wysdome can best bee thought convenable, unto the Kinges
goode grace, for th’excuse of my nown comyng; prayng yow hertly to
certifye me, by comers bitwen, suche tidings as ye shal have in thos
partiez, with othre your good pleasir to be perfourmed at my power, as
knoweth oure Lord, to whom I biseche to ever have yow in his blissed
proteccion and keping.
Wryten at Shirrifhoton, the xxiiij. day of Januare.
Your trew brodir, wich prayth you hertely to excuse me
to the Kings Heghnesse.