_A Stevyn Scrope._
[Sidenote: 1457 / OCT. 30]
Worschepeful and my right wel beloved Sone, I comaund me to yow, and
hertily thank yow for your good avertismentys, and right well avysed
lettres to me sent from tyme to tyme, and so pray yow of your good
continuance.
Plese it yow to wete that, for as mech as the parson Sir Thomas Howes
cometh up at this tyme by the grevous pursewte of John Andreus and
Heydon, to apere be fore the right worschepeful Sir, my right wel be
loved brother, your fadir,[121.1] and other the Kynges Juges of the
Kynges Benche,--I pray zow hertily that ye wille have in remembraunce
for to recomaund me to hym whan ye speke with hym, and for to thank hym
for his rightful favour shewed in Sir Thomas matier, and in alle other
maters that toucheth me, wheche ben attained in that hey courte; and so
it lyke yow, pray hym of his good continuance, and I shall doo serve it
unto hym to my symple power for his good wyl to me shewed, and to myne;
and I trust to God that he shal hold hym plesid. And that it like yow to
geve credence to the seid Sir Thomas of that he shal sey to zow for my
worschepe and profyte, and that this lettre may recomaund me to my
doghtir your wyf, be sechyng the blissed Trinite to sende yow the
acomplyshment of your good desyre.
Wretyn at Castre, the xxx. day of Octobr.