As for nouveltes none comth,[118.1] but yt ys seyd the sege shall com to
Calix. The Erle of Warwyk[118.2] ys yhyt at Caunterbury with the
Archbyship,[118.3] and the Erle younger brothere[118.4] maryed to Sir
Eadmund Yngylthorp doughter uppon Seynt Marks Day. The Erle of
Worcestr[118.5] broght aboute the maryage. The Queen and the Kyng at
Herford,[118.6] the Lordes Bokyngham,[118.7] Shrewsbury,[118.8] and
otheres ther. And now it ys seyd Herbert[118.9] shall com ynne, and
apper at Leycester before the Kyng and the Lordes, hys lyfe graunted and
godes, so he make amendys to theym he hath offended. Manye be endyted,
som causelese, which makyth Herbert partye streng, and the burgeys and
gentlemen aboute Herford wille goo wyth the Kyng wyffe and chylde, but a
pease be made or the Kyng part thens, for ell[es] Herbert and hys
affinite wille acquyt them, as it ys seyd.
The Erle of Warwyk hath had the folks of Caunterbury and Sandwych before
hym, and thanked hem of her gode herts and vytaillyng of Calix, and
prayeth hem of contynuaunce.
I sende a bille of the namys endyted to my maister and yow, to see and
laugh at theyr Wellsh names descended of old pedegris. Our Lord be with
yow.
Wryt hastly at London, the fyrst day of May.