_To the worshipful and my right welbeloved cosyn, John Paston, at the
Temple, or to William Barker, at Suthwerk, be this delvered._
[Sidenote: 1456 / NOV. 18]
Worshipful cosyn, I comaunde me to yow. And where as I late wrote unto
yow in a lettre by Henre Hansson for the fundacion of my college, I am
soore sette therupon; and that is the cause I write now, to remembre yow
agayn to meve my Lords of Canterbury[111.2] and Wynchestre[111.3] for
the licence to be opteined, that I might have the morteisying withowte
ony grete fyne, in recompence of my longe servise contynued and doon un
to the Kyng, and to his noble fader, whom God assoile, and nevere yette
guerdoonned or rewarded.
And now sithe I have ordeyned to make the Kyng founder, and evere to be
prayed fore, and for his right noble progenitors, hise fader, and
uncles, me thinketh I shuld not be denyed of my desire, but the rather
to be remembrid and spedde.
Wherfore, as I wrote un to yow, I pray yow acqueynte me and yow, for the
rather spede here of, with a chapelleyn of my Lord of Caunterbury, that
in your absence may remembre me, and in like wise with my Lord
Chaunceller;[112.1] for seyng the Kyngs disposicion, and also hise, un
to the edyfyeng of God is service, it myght in noo bettyr tyme be mevid,
&c.
My Lord of Norffolk is remevid from Framlyngham on foote to goo to
Walsyngham,[112.2] and deily I wayte that he wolde come hidre.
Your cosyn,