_To the right worshipfull and myn especiall maister, John Paston,
Esquyer, in hast be this delivered._
[Sidenote: 1456 / OCT. 16]
After al due recomendacion, like it you to wete, that the day of your
assise is _die Lunæ proximo post tres septimanas Sancti Michaelis_,
whiche is on Moneday come vij. nyght; at whiche tyme I trost ye wole be
here, or ellis can I do lytell or nought there inne.
As touchyng your mater ageynst Gunnore, that dwelleth in lawe, I have
spoken to Lyttelton,[107.2] and comuned with hym there in, but it is not
yet spoke of atte barre. Gunnore hath waged his lawe[107.3] of that he
haade his day to wage it of, &c.
As touchyng your issues at Wentworth sute, it is ij_s._, and it was
retourned er I come here. My Maister Fastolfs councel taketh heed
thereto, &c.
As for tydynges, my Lord Chaunceler[108.1] is discharged. In his stede
is my Lord of Wynchestre.[108.2] And my Lord of Shrewisbury[108.3] is
Tresorer, and Broun[108.4] of your Inn is Undertresorer. If ye wold
sende to hym to graunte you the namyng of th’eschetorship of Norffolk,
&c., it were weel do, for it is told me he wold do moche for you.
Maister Lawrence Bothe[108.5] is Prive Seall. And it is seid that my
Lord of York[108.6] hath be with the Kyng, and is departed ageyn in
right good conceyt with the Kyng, but not in gret conceyt with the Whene
[_Queen_]; and sum men sey, ne hadde my Lord of Buks[108.7] not have
letted it, my Lord of York had be distressed in his departyng.
On Moneday last passed was a gret affray at Coventre bytwene the Duke of
Somersets men and the wechemen [_watchmen_] of the toun, and ij. or iij.
men of the toun were kylled there, to gret disturbance of alle the Lords
there; for the larom belle was ronge, and the toun arose, and wold have
jouperdit to have distressed the Duke of Somerset, &c., ne had the Duke
of Buks not have take a direccion therein.
Also it is seid the Duke of Buks taketh right straungely that bothe his
brethren[108.8] arn so sodeynly discharged from ther offices of
Chauncellerie and Tresoryship; and that among other causeth hym that his
opynyon is contrary to the Whenes [_Queen’s_] entent, and many other
also, as it is talked. Item, sum men seyn, the counseal is dissolved,
and that the Kyng is forth to Chester,[109.1] &c. Also summe sey that
many of the Lords shall resorte hiddir to London ageynst Alhalwen tyde.
And as touchyng th’eleccion of Shirefs, men wene that my Lord of
Canterbury shall have a gret rule, and specyall in our countre.