_To my right worshipful Maister, John Paston._
[Sidenote: 1456 / OCT. 8]
Right worshipful Sir, and my good maister, I recomaunde me to yow, and
have receyvid a lettre from yow by Sir Thomas is man, berer here of. And
as for the accions,[102.2] bothe of ravishement and th’attachement, the
declaracions ar made _tunc solvend’_ and not _solut’_, and as moche
amendid as we can or may be favour have amendid. We hadde be beguyled
and they hadde not be sen in Norffolk, for here til this day come noo
counsaill; and to have _per manus Johannis Wyngfelde_ it wole not be,
for we can not bringe it inne, and also it is to late.
And as for iiij^{xx}_li._ [_fourscore pounds_],[102.3] Fenn and I mette
with Worsop this day, and he spake soore to Fenn and me, and we put hym
overe, saying we wolde doo as moche as we myghte. I thinke verily that
Fenn wole deserve ther inne a thanke, but I can not understande hym what
he wolde be doon to, or how rewardid, for whanne I speke of it he is
desplesid, and seithe he desirith noo rewarde; but he farith as a man
wole sey he wold noo silvere, and lokith awaywardes and takith a noble.
And he hath written to yow of the matere of Sir Philip Wentworthe
touching this writte of _liberate_,[102.4] whiche is but a color and noo
warant sufficient, ner we owe not to doo no thinge that shuld obeye it,
ner the Shireve nother dothe but of favor that he dothe to hem, and hym
liste otherwise to doo, as Fenn writeth yow more pleinly. And as for a
_supersedies_ [_sic_], there lithe noon, as he seith, up on a
_liberate_.
And as for entryng in Bradwell, thei doo opyn wronge, for after myn
patent opteyned, there was a writte to sease it into the Kynges hande,
and soo it was and is. And as to your patent, it is counsailled me to
have a writte to th’eschetor _de custodia liberanda_, whiche may not be
denyed. And if we myght have _una cum exitibus a tempore mortis_, it
were a sovereigne writte. It shalbe assaied, and doo thertoo what can
lete; the fermours be promised to be saved harmeles and chargid not to
paie ony thing to them.
And as for the iiij^{xx}_li._ [_fourscore pounds_] to be sette on
Olivere is taile, I can not see it wole be, for there is noo suche
worlde to bringe it abowte. It is faire, and we can ghete it on Fulthorp
is dette by grete labor for agrement, for I drede it wole be moste agayn
us that it is of recorde soo longe unpaied. And Hue at Fenn sueth now to
Nailer to ghete owte moo _liberates_, suche as the last were to the last
eschetor. And this God graunte thei take good spede.
And as to your isseus, I shal accordyng to your lettre speke with
Gresham whanne he cometh, and the Juges and Barons bothe shalbe enformed
of the title of Wentworthe, as ye write, and how it is up on a feyned
dede upon surrender, and a patent cancelled, &c., which Fenn hath
promisid to doo.
And as to Sir Thomas matier, I write un to yow and hym joinctly what
hathe be doon therinne at this tyme. And Jesu have yow in kepyng.
Writen at Suthwerk, the viij. day of Octobre.
As to tidinges, the Kyng and the Quene ar at Coventre.[103.1] The
Counsail be ganne there yesterday, and my Lord Shrewyshbury,[103.2]
Tresorier of England, and John Wode shalb [_shall be_] Under-Tresorer.
Thus thei say in the Chequer.
Your owen,