_To my right good maister, John Paston, Squier, at Norwiche, in haste._
[Sidenote: 1456 / JUNE 7]
Sir, please it your maistership to wyte, I have my attachements graunted
in open Courte with helpe of Litelton[91.4] and Hewe at Fen, and was
bide to make redy the names, &c. before the Barons, of which
Haltoft[91.5] was one. . . . . . . . . .[91.6]
As for tidings, the Kyng is at Shene, the Quene at Chestre; the Duc of
Buk was, as I come hiderward, at Writell, the Erle of Warrewyke at
Werrewyke, and the Lords Chaunceller,[92.1] Tresorier,[92.2] and th’Erle
of Sar’ [_Salisbury_] in London, and noo more Lords at the begynyng this
day of the grete Counsail. Many men say that there shuld be, but thei
wote not what. The sege shall, as men say, come to Caleys and to Guynes,
for moche puple come overe the water of Somme, and grete navies on the
see.
Th’Erle of Penbroke[92.3] is with the Kyng, and noo more Lordis. Th’Erle
of Richemond[92.4] and Griffith Suoh (?) are at werre gretely in Wales.
The Comons of Kent, as thei werre wo[n]tte, er not all weel disposid,
for there is in doyng amongs hem what evere it bee. Of Scotts is here
but litell talkyng. My Lord York is at Sendall stille, and waytith on
the Quene and she up on hym.
I dide my maistress your moderis erands, as ye have herde of, for
Maister William hath writen his entente, and he and Clement faren weel.
Writen at Horshighdone, vij^mo die Junij.
Rokewode and Crane faren weel, and thei and I recomaunde hem to my
maistress your wif.
And as I understande, the Clerke of the Rolles is owte of charite with
Maister Yelverton, and my Lord Chaunceller a litell mevid, &c.
Your owen,