_To my right wurshipfull cosyn, John Paston, Esquyer._
[Sidenote: 1456 / MARCH 30]
Ryght worshippfull and enterly belovyd cosyn, I comaund me to yow
hertyly; latyng yow wete that there ys a contraversie mevyd be twix my
cosyn John Radeclyff[80.2] of Attylburgh and me for the advoweson of the
chirch of Attylburgh, the whech ys now voide, wheroff the title is myn
veryly as God knowith, the whech shall be oppenyd unto yow; and upon
Thursday next atte Wymondham, there shall be take an enquerre _de jure
patronatus_ afore Master Robert Popy and Master Symond Thornham, atte
whech day I may nought be my selff as God knowyth, and thow I myght, yt
were not convenyent.
And therfore, ryght trusty cosyn, consideryng that I am a wedowe
impotent as of body, tendyrly and hertily I pray you, yf yt lyke yow, to
be there assistyng my councell in my right as reson and lawe will upon
Thursday next, be viij. of the clokke; and Fyncham,[80.3] Spelman, and
othir of my councell shall be than there waytyng upon yow. And, jentyll
cosyn, have me excused thowh I wryte thus brefly and homly to yow, for
in trouth I do it of a synguler trust and affection, the wheche I have
in yow, consideryng the goode nome and fame of trouth, wysdom, and good
conducte, the which I here of you. And therfor, and ye may to youre
well, I beseche you hertyly to be there, and ye shall nought lese therby
with the grace of Almyghty Jesu, the wheche evyr preserve and promote
you, gentill cosyn, in moche worship to youre hertys ease.
Atte Bokenham Castell, on Teuysday in Pache weke, in hast.