_To my right worshipfull Maister, John Paston._
[Sidenote: 1456(?) / [MAR. 24]]
After due recomendacion had, please it your maistership to wytte that
William Yelverton was mevid by me to comene with my maister his fadir,
as I wrot to yow from Norwich. And now he tellith me that he hath
comened with his fadir; and he undirstondith that his fadir seyth that
he hath not knowelaged Fennes[78.2] obligacion. And he seyth that
Maister Fastolf undirstood that Fen hadde title to the maner of
Haryngby, and therfor wold he that Fen shuld have it after Maister F.
lyve; and, by liklynes, ther shall be labour made by Fenn to have
releses of Maister Yelverton, &c., but he hath not yet relesed. He can
no more undirstond of hym as yet. If he can undirstond ony more pleynly
this day, I shall have knowelage at Norwich on Friday or Saterday next
comyng. Please it you to have pacience, though I write so brefly.
In hast, at Walsyngham, the Wednesseday next to fore Esterne.
Youre pouere servaunt,