_To the worshypfull Sir, John Paston, Escuier._
[Sidenote: 1456 / JAN. 27]
Worshypfull, aftyr dew recomendacion, please your gode maistershyp to
wete that where as my maister wrytith to yow so homelye of so manye
materes to yow of hys, to be remembred unto hys councell lerned by mene
of yow and of hys frendz and servauntz there, y pray yow and requyre yow
not to wyte [_impute_] it me that y am the causer of it that my seyd
maister noyeth yow with so manye materes, for, be God, hym sylf
remembryth the moste part of hem; albe it the particler rehersell of the
materes be fressher yn my remembraunce then yn hys. And, Sir, yn trouth
he boldyth hym to wryte to yow for the grete lofe and singler affeccion
he hath yn yow before all othyr yn hys causes spedyng, and that ye wille
moste tendyrlye of ony othyr remembre hys servauntes as well as othyrs
to whom belongyth to spede the materes. He desyryth my Lord Chauncellor
shuld wryte to hym speciallye yff he most nedes com upp, and a bille to
be made yn to Parlement for recuvere of my Lord Bedford godes.
Sir, there ys one Haryngton of Doncastre, a besye soule, that damagyth
my maistre to gretely in Bentley. And Herry Sotehille ys of my maister
councell, but no thyng that ys profytable ys don to hym to remedye it,
ye shall see by one Sir John Vincentes letter sent to yow now, and W.
Barker can enforme yow. Yn the ende of thys terme y suppose to be at
London, and yn to west contre. My maistre wrytith to yow for a rent of
viij_li._ of annuite charged of a touneshyp called Batham Wyly, that
Maister Scrope he shall be beneficed yn the ryzt of it. Ye have nede
fare fayre with hym, for he ys full daungerouse when he wille. Y gate
hym gode evidensis of the seyd rent that my maister ne my lady had
nevere, and he can not know it, &c. Also my maister hath wreten to yow
for avice of a new feffement to be made for the maners of Tychewell and
Beytone, and betyme he desyryth to be sent hym. Y pray yow, and ye se
Maister Yng at a leyser to commaund me to hym, and trustyng hys gode
maistershyp that he wille be of my councell ayenst one William Fouler of
Bokyngham thath kepyth from me a litelle lond. And yff he wille contynew
hys gode maistershyp to me, ye may sey hym that I cast duelle yn my
contree, and wayt uppon hym to help ghete ayen a pore gode of myn, for
heere y thryve not, but lose my tyme. Y pray our Lord have yow yn hys
kepyng.
Wryt hastlye, the xxvij. day of Januare.
Your,