[Sidenote: 1456(?)]
Please yow to wete that my maister[67.2] yn allwyse wille that I ryde to
Dedham to speke with Broke as well as wyth the stuard, and to gefe
aunsuer to Broke yn whate wyse he wille depart for the reuersyn; he was
ryd or I came home. And my maister wille comyn with yow for the moyens
of a chauntuarye to be founded of the place ye wote off; y seyd hym such
chargeable maters wold be doo betyme to know the certeyntee. And a
greter lak ys yn hym, he taryeth so long to put all thynges of charge yn
a sure wey; hyt ys for lake of sad councell to moove hym. And I most be
at Castre by Thursday next; and I pray yow let me not be lete of my
voyage yn to my contree, and I shall kepe Yorkesshyre with Spyrlyng, or
such as shall ryde. The parson[68.1] with yow shall do well sort my
maister evidences, and that ys one the grettist thyng nedefull for the
seurtee of hys lyfelode; and so it wold be remembred hym, for now all
thyng ys sett at appoynt, how it standyth with hys debtys and officers,
except that mater of grettist charge, and also to provyde for the
approwement of hys lyfelode.