_To my maister, John Paston._
[Sidenote: 1456 / JAN. 6]
Please your maistershyp to wete that I had sent yow word of the god
chiere that the persons ye wote off had here uppon New Yeer Day, and how
well they toke it, but W. Barker coude playnly enforme yow. And John
Sadler of Ocle told me how they avaunted of it when he of Lynne came by
hym at nyzt lyeng, that he had neider better chier, &c.
My maister demaundyth me sondry tymes when ye shall be here. I coude not
sey till thys day be passed. William Geney shall be here to morn, so
wold Jesus ye were her then. I asked licence to ryde yn to my contree,
and my maistr dyd not graunt it; he seyd hys wille was for to make, &c.
Y aunsuerd it fyt not me to know it. God gefe hym grace of holsom
councell, and of a gode disposicion; _non est opus unius diei, nec unius
septimanæ_.
My Lord Bedford wylle was made yn so bryeff and generall termys, that yn
to thys day by the space of xx. yeer can neider hafe ende, but all wey
new to constrew and oppynable; so a generallte shall ne may be so gode
as a particuler declaracion.
I wryte blontly. I had foryete to hafe told yow Maister Fylongley meoved
me to enforme my maister to hafe a generalle pease, so it myzt be
worshypfull. Y hafe seyd no word, for I can not medle yn hygh maters
that passyth my wyt; and therfor yff ye and W. Geney mete to gheders, ye
know and can devyne best what ys to be doon. Our Lord be with yow.
Wryt hastly, vj. day Januar.